Toe lahi ange e faihala 'i Tonga he 'aho ni - Kalafi Moala Featured
Kalafi Moala
26 Siulai, 2016. ‘Oku tukuaki’i ‘e he tangata faiongoongo fuoloa mo ‘iloa ‘i Tonga ni ko Kalafi Moala ‘oku kei hokohoko atu pe ‘a e faihala mo e ngᾱuehala’aki e mafai ‘i he Pule’anga Tonga ‘o a’u mai pe ki he ‘aho ni.
‘I ha fakamatala ‘a Moala ki he Letiō Nu’usila na’a ne fakahᾱ ai ‘oku ‘ikai fu’u liliu ha me’a ‘i he ta’u ‘e 20 kuohili ‘o a’u mai pe ki he ‘aho ni kae tautautefito ki hono ngᾱuehala ‘aki ‘a e mafai.
‘Oku ‘uhinga ‘a Moala heni ki hono kei hokohoko atu pe hono fakatau ‘a e paasipooti tipilometika ‘o a’u mai pe ki he ‘aho ni ‘a ia ko e fakatᾱtᾱ ia ‘i he’ene fakamatala ‘a e kei hokohoko atu pe ‘a e faihala ‘i he fonua.
Na’e fakamatala foki ‘a Moala ‘o pehe ‘oku ‘i ai ‘a e ni’ihi ‘oku tali hopo pea ‘i ai mo e ni’ihi kuo fakahῡ pilīsone lolotonga ia ‘oku ‘i ai ‘a e ni’ihi ‘oku te’eki pē ke fakahoko ha ngᾱue kiate kinautolu.
Na’e hoko atu ‘a Moala ‘o pehe ‘oku te’eki ke lava ‘o solova ‘a e ngaahi palopalema ‘o e kuohili pea ‘oku toe tanaki atu mo e ngaahi founga ta’ota’ofi ‘o e ‘aho ni ‘oku kaunga lahi ia ki he toe fihi ange ‘a e palopalema ‘i he fonua.
Na’e toe fakahᾱ foki ‘e Moala na’e ‘i ai ‘a e ‘u kautaha fakavaha’a pule’anga kuo ‘osi ngᾱue mai ki Tonga ni hangē ko e Transparency International ka ‘oku ‘ikai ke malava ke fakahoko ‘enau ngaahi taumu’a.
'I he fakamatala ‘a Moala ‘oku ‘i ai ‘a ongo matu’a Siaina ‘oku ‘iate kinaua ‘a e paasipooti tipilometika ‘e 7 ka ‘oku ‘ikai fakahoko ha ngᾱue kiate kinaua.
Na’e a’u foki ‘a e fakamatala ‘a Moala ki he liliu faka-politikale ‘o e 2010 ‘a ia na’e taumu’a ke toe fakatemokalati ange hono pule’i ‘o e fonua ka ‘oku hᾱ mahino mai ‘oku te’eki ke a’usia ‘a e ngaahi lelei ‘o e temokalati na’e fai kiai ‘a e ‘amanaki.
