Tohi Tangi PSA ki he Tu’i ^Featured

Ko e Tohi Tangi ‘eni ‘a e Kautaha ‘a e Kau Ngāue Faka Pule’anga (PSA) ki he Tu’i hili ia ‘a hono ‘ikai tali ‘e he Kapineti ‘a e ‘enau fokotu’u atu ke toloi ‘a e fokotu’utu’u hiki vahenga ‘a e Pule’anga.

Na’e kole foki ‘e he Kautaha ‘a e Kau Ngāue Faka Pule’anga (PSA) ke toloi ‘a e fokotu’utu’u ko ‘eni ki he ta’u kaha’u ka na’e ‘ikai tali ‘eni ‘e he Kapineti. Na’e fakahāfoki mei he Kapineti ‘e toki fakahoko atu mei he Komisoni ‘a e Kau Ngāue Faka Pule’anga mo e Ma’u Mafai ki he Vahenga ‘a e tali ki he ‘uhinga hono tu’ulāhoko atu ‘a e ngāue ni.

Ko hono fakahoko ‘eni ‘a e fokotu’utu’u ko’eni hili ha ngāue kiai ‘a e Ma’u Mafai ki he Vahenga he ta’u ‘e ua ka ‘oku fakaanga’i lahi ‘eni ‘e Mele ‘Amanaki ko e Sekelitali ‘o e Kautaha ‘a e Kau Ngāue Faka Pule’anga (PSA) ‘o pehe  na’e ‘ikai ‘ata ki tu’a ‘a e founga ngāue.

Na’e toe fakahā foki ‘e Mele ‘Amanaki ‘oku fakafuofua ki he toko 500 na’a nau fakamo’oni hingoa ki he Tohi Tangi ko’eni ki he Tu’i pea ‘oku mahino pe foki ‘a e ‘uhinga ‘oku ‘ikai fakamo’oni ai ‘a e ni’ihi ki he Tohi Tangi ko ‘enau ma’u’anga ngāue.

‘I he taimi tatau fakatatau ki he fakamatala ‘a Mele ‘Amanaki ‘e fakahoko moha kole ki he Fakamaau’anga Lahi ha tu’utu’uni ke ta’ofi (Supreme Court injunction) ‘a e ngaue ko’eni.