Fu’u ‘ilonga fakapalataha 'a e Sea Komiti Kakato Featured
Penisimani Fififta (Fakafofonga Fale Alea Tongatapu 9), Sea Komiti Kakato 'a e Fale Alea
Nuku'alofa, 17 Sune 2016. ‘Oku ‘i ai ‘etau palōveape ‘iloa koe “Vikia ‘a ‘Apolosi ka kuo tau viku pongipongi” ‘a ia ‘oku ‘uhinga ia ko ‘etau viki’i mo ‘amanaki ki ha me’a lelei ‘e hoko kae iku ‘o ‘ikai hoko. ‘I he ‘ene ‘ikai hoko leva ‘oku tuenoa leva ‘etau ‘amanaki.
‘Oku pehē tofu pe ‘a e vakai tau’atāina ki he fua fatongia ‘a e Sea fo’ou ‘o e Komiti Kakato Penisimani Fifita (tapu ange moia) ‘a ia ko e memiipa pe foki ia ‘o e Paati Temokalati ‘Otumotu Anga’ofa ‘a e Palēmia pea na’e heka mai he ta’au ‘o e Palēmia mei he Vahenga Fili Tongatapu 9.
‘Oku ‘ikai koha toe kaveinga ‘eni ke tau toe hela hono fokihi he ‘oku maau kakato ‘a e feme’a’aki ‘a e Fale Alea ‘i he Komiti Kakato ‘i he Miniti ‘a e Fale Alea pea toe fakamafola hangatonu mai foki ‘i he letiō ‘o fanongo kiai ‘a e kakai ‘o e fonua. 'Ikai ngata heni ka kuo kamata 'ohake 'eni 'i he ngaahi mitia 'o a'u ki he mitia faka-sosiale.
‘Oku ‘i ai leva ‘a e fakame’apango’ia ‘i he ‘ilonga ‘a e kau fakapalataha ‘a e Sea ko’eni ki he tafa’aki ‘a e Pule’anga pea hā mahino pe ia ‘i he’ene tukuange ‘a e Palēmia ke fa’iteliha neongo ‘oku ‘ikai ha’a ne poini fakatonutonu pe tali ha’a ne tokoni ‘o fakatatau ki he tu’utu’uni feme’a’aki ‘a e Fale.
‘Okiu fu’u mata’ā’ā ‘a e me’a ko e fakahekeheke ‘a e Sea Komiti Kakato ki he Palēmia pea na’a ne ‘osi he’aki tu’o taha ‘i he feme’aki ‘oku tui ia ki he poini mei he Palēmia mo e Pule’anga. ‘Oku ngalo leva he motu’a faiaako tutuku ni ‘oku tapu ‘aupito 'i he fatongia ko’eni kete fakahā ‘a e fa’ahi ‘oku te tu’u mei ai he ko hono makatu'unga ko e tau'ataina.
‘Oku ake heni ‘a e manatu ‘a e tokolahi ‘a e kau fanongo Fale Alea kia Sifa Tu’utafaiva ‘a ia ko e Sea Malōlō ia ‘o e Komiti Kakato pea na’e toe kau pe foki ki he Paati ‘Otumotu Anga’ofa. Na’e kehe ‘a e fatongia mo ‘ene tau’ataina 'iate ia pe mo e tafa’aki na’e kau kiai ‘a Tu’utafaiva pea na'a ne malava ke fakakehekehe'i. Na'e ifo mo mahino leva ‘a e feme’a’aki ‘i he Fale Alea pea mahino ki he kakai e fonua.
‘Oku fu’u pongipongi hono fakatokanga’i ‘a e ‘ao’aofia ‘a e fua fatongia ‘a Penisimani pea ‘oku tokolahi ‘a e kakai ‘oku nau tālanga’i ‘eni ‘i he lēvolo kotoa he mo’ui ‘i Tonga ni ‘o a’u ki he kau mama kava Tonga. Ko e me’a ‘oku totonu ke fakatokanga’i ‘e Penisimani Fifita ko e fatongia ‘oku totonu ke tau’atāina pea kuo maama ‘a e fonua ‘o ‘ilo ‘a e fakahekeheke, fakapalataha mei he mo’oni mo e poini.
