Ngali kuo me'anoa 'a e faihala ki he Kapineti? ^Featured

'26 Me, 2016.

Etita,

Kuo 'osi 'eku tumu pea 'oku ou loto lahi keu lea hei'ilo na'a ongo a ki Langi pe koha Palanite he 'oku faingata'a keu tui 'oku malava ke hoko ha me'a pehe ni 'i ha fonua lotu mo sivilaise. 'Oku'ikai keu 'ilo pe 'oku fefe 'a e anga 'a e fakakaukau hotau kau taki. 'Oku makatu'unga 'eni 'i he vilita'e'unua 'a e kapineti ke totongi 'a e pa'anga tolukilu $300,000 ki a Tomifa Paea mo'ene 'u me'angaue 'oku mahino 'oku fengataliaki, 'ikai ngaue lelei pea motu'a mo ta'e'aonga.

Kuo fakaha mai 'e he Minisita Pa'anga 'i he ongoongo 'a e Letio Tonga  'oku te'eki ai ke fakahoko e totongi ko'eni pea 'oku tau fakamalo'ia he feinga 'a e Potungaue ko 'eni ke ta'ota'ofi 'eni neongo kuo pau ke fakamalohi'i 'eni 'e he Kapineti faka langa lea ko'eni . 'I he taimi tatau 'oku mahino 'oku 'i ai mo e tu'utu'uni 'a e Fakamaau'anga ki he ngaahi mo'ua 'o Tomifa Paea 'i he Pangike ANZ pea kuo pau ke 'alu hangatonu e totongi ko'eni ki ai. 'Oku 'i ai mo hono mo'ua lahi 'i he Kasitomu pehe ki he Poate Tonga Assets Management 'a e Pule'anga.

'Oku ongo ki hoku loto pea 'oku ou 'ilo 'oku tui pehe 'a e tokolahi he 'oku lau pe 'eni ia koe totongi 'e he Pule'anga 'a e mo'ua 'o Tomifa he 'ata'ataloa. 'Oku 'i ai 'a e si'i kakai kuo fa'ao 'e he Pangike honau fanga ki'i motu'i fale 'i he mo'ua 'oku lau afe si'i pe. Teu fiefia kapau 'e ala mai e Pule'anga 'o fakatau atu ha'anau motoka kuo motu'a pe maumau pe ko ha'anau motu'i palau kuo hili'anga kulo ke si'i totongi 'aki kae lava ke fakafoki mai e motu'i fale ke hu kiai e fanga ki'i famili ko'eni.

'Oku fakamamahi he kuo 'oatu e fale'i mei he kau fakamahu'inga tau'ataina, 'Enisinia 'a e Potungaue Ngaahi Ngaue Lalahi, fokotu'u mei he Potungaue Pa'anga ki he Kapineti ke totongi pe $100,000 kae loto pe Kapineti ke saute'i pe 'a Tomifa 'aki e $300,000.

'Oku 'ikai ke 'uhinga hono talitali lelei'i kimoutolu 'i Vava'u mo nofo Hotele 'i Puataukanave ke mole ai e fakakaukau lelei ia ai he 'oku si'i sio atu pe kakai masiva 'o e fonua.  Kuo toe fili 'a Tomifa ki he ngaahi Poate 'a e Pule'anga he 'oku poto ia he tunu puaka mo hono fakaheka Hummer e kau taki 'oku nau 'ahia 'a e Lolo.

'Oku ongo kiate au 'a hono pa'usi'i e ivi e kakai 'o e fonua pea teu ui 'e au 'eni 'oku hoko e faihala ia ko e me'anoa ki he Kapineti 'a 'Akilis Pohiva.

Faka'apa'apa Atu,

'Eliesa Fifita,

Kolomotu'a