Fakatau $300,000 Pule'anga Me’angāue Motu’a mo Mamafa ‘a Tomifa Paea Featured
Nuku'alofa, 13 Me 2016. ‘Oku fai e fifili pe ko e hā koā ‘oku vilita’e’unua pehe ai ‘a e Pule’anga ke fakatau ‘a e ngaahi me’angāue motu’a, ‘ikai falala’anga mo ta’efe’unga ‘a e Kautaha Vava’u Construction ‘a Tomifa Paea
Kuo paasi pea tali lelei ‘e he Kapineti ‘i he Tu’utu’uni Kapineti Fika 436 ‘o e ‘aho 29 ‘o ‘Epeleli 2016 ke fakahoko ‘a e fakatau ko’eni ‘i he malumalu ‘o e ngaahi makatu’ung ko’eni;
1. Ke fokotu’u atu ‘e he Pule’anga ki he Kautaha Vava’u Construction ‘a e mahu’inga ko e $300,000 ke fakahoko’aki ‘a e fakatau mai ko’eni;
2. Kapau ‘e tali ‘eni ‘e he Kautaha Vava’u Construction pea ke to’o ‘a e pa’anga ‘e $300,000 mei he pa’anga monomono hala (Road Maintenance Project) ‘a e Potungāue ki he Ngaahi Ngaue Lalahi.
3. Ke fakahoko ‘a e alelea mo e Kautaha Vava’u Construction ‘e he Potungāue Tukuhau mo e Kasitomu.
‘Oku fai e fifili ki he vilitaki ko’eni he kuo mahino na’e ‘osi fakahoko hono fakamahu’inga tau’atāina ‘a e ngaahi me’angāue ko’eni ‘e he Kautaha Tau’ataina pea na’a nau fokotu’u atu ko e mahu’inga ‘o e ngaahi me’angāue katoa ‘e ‘ikai laka hake he pa’anga ‘e taha kilu ($100,000).
Na’e toe fekau’i foki ‘e he Minisitā malōlō ‘o e Potungāue ki he Ngaahi Ngāue Lalahi ‘Etuate Lavulavu kia Maile Niulala ko e Pule ‘Enisinia ‘a e Potungāue ‘i he 2015 ke fakamahu’inga’i ‘a e ngaahi me’angāue tatau ki he pa’anga ‘e taha miliona ($1,000,000) pea na’e ‘ohake ‘eni ‘e he ngaahi mītia ‘o molia hifo ai pe ‘a e kaveinga ko’eni.
Kaikehe, lolotonga ‘a e fakakaukau kuo ‘ikai toe fakahoko e fa’ahinga fakatau fakapone pehe ni kuo tali ‘e he Kapineti ia kenau fakahoko’eni lolotonga ia kuo mahino ‘a e tukunga ‘o e ngaahi me’angāue ‘a ia ‘oku nau laine hange ha ma’ulu’ulu ‘i Poutaha. Kuo lauita’u ‘a e tu’u ‘a e ngaahi me’angāue ko’eni pea ‘oku laka hake he ta’u ‘e 20 honau motu’a tukukehe ange ‘a e ‘ikai ha fale kenau tau kiai ‘i he taimi ‘uha mo e la’ā.
‘Oku mahino pe foki na’e toki vali he faka’osinga ‘o e ta’u kuo ‘osi 2015 ‘a e ngaahi me’angāue ko’eni ke hā ngali matamatalelei mai ka ‘oku ‘ikai puli honau tukunga. Kuo ma’u mo e fakamatala mei he Potungāue pa’anga ‘oku te’eki ke fakahoko ha totongi ki he Kautaha Vava’u Construction pea ‘oku ‘i ai mo e ‘amanaki ‘e malava ke muimui’i lelei ‘a e tu’utu’uni ‘a e lao ki heni ‘e he Potungāue Pa’anga.
‘Oku toe fehu’ia foki he taimi tatau ‘a e kaunga ‘a e Potungāue Pa’anga, Tukuhau mo e Kasitomu ki he fakatau ko’eni kae pehe ki he tu’unga mo’ua ‘o e ngaahi me’angāue ni ki he ngaahi Pangikē.
