Tuku ki Tu’a Viola Ulakai mei he Letiō Tonga: Fokotu’u mei he Palēmia ^Featured

Ko e tu’utu’uni foki ‘eni ki he Poate makatu’unga ‘i he tohi na’e fakahoko atu mei he ‘Eiki Minisitā ki he Ngaahi Pisinisi ‘a e Pule’anga Hon. Poasi Tei ‘i he ‘aho 15 ‘o ‘Epeleli 2016 Fika 'o e Tohi (Reference) MPE/P14/L244/16.

‘Oku mahino mai foki ko e tohi ‘a e Minisitā ‘o e Ngaahi Pisinisi ‘a e Pule’anga ki he Sea Poate Komisoni Fakamafolalea na’e makatu’unga ia mei he tohi ‘a e Palēmia ‘Akilisi Pohiva ki he Minisitā Poasi Tei ‘i he ‘aho 13 ‘o ‘Epeleli ‘o fakahoko kiai ‘ene launga. Na'a ne fokotu’u atu ai pe ki he Minisitā ke tuku ki tu’a (suspend) ‘a Viola Ulakai kae vahe pe pea ke fakahoko leva ha fakatotolo fekau’aki mo e ngaahi tukuaki’i ‘oku fakahoko kiate ia. Ko e tohi 'eni 'a e Palēmia na'e fakahoko 'i he 'ulu'i tohi 'a e Potungāue Ako pea ko e kaveinga 'o e tohi ko e "Fakahā 'a e ta'efiemālie 'i he founga ngāue 'a Viola Ulakai, Komisoni Fakamafolalea 'a Tonga" (Expression of Concern over Actions of Mrs. Viola Ulakai, Tonga Broacasting Commission).

Ko e palakalafi faka'osi 'o e tohi 'a e Palēmia ki he Minisitā na'e fakamulituku 'aki 'a e fakalea 'o pehe ni;

"In light of the aforementioned concerns, I write herein to recommend for your consideration that Mrs. Viola Ulakai be suspended with pay while investigation is undertaken to address her actions" (Makatu'unga he ngaahi ta'efiemālie 'i 'olunga, 'oku ou fokotu'u atu ke tuku ki tu'a 'a Viola Ulakai kae vahe pe pea ke fakahoko leva ha fakatotolo fekau’aki mo e ngaahi tukuaki’i ‘oku fakahoko fekau'aki mo ia).

‘Oku mahino foki koe tu’utu’uni ‘eni mei ‘olunga hange ‘oku tau anga maheni kiai pea ‘oku malie ‘a hono fakahoko ‘e he laine ‘o e mafai ‘a e tu’utu’uni ko’eni ‘o ‘ikai toe fehu’ia pe koe toe sio atu ki hano ola ‘oku hanganaki mai mei he kaha’u. Ko e poini ‘e 4 na’e fakamamafa ai ‘a e tohi ‘a e Minisitā ki he Sea ‘o e Poate Komisoni Fakamafolalea ‘a Tonga Tapu Panuve ke makatu'unga mei ai 'a e tu'utu'uni kia Viola ‘a ia na’e anga pehe ni;

1.    Ko e ‘imeili ‘a Viola Ulakai ‘o fehu’ia ‘a e tu’unga taukei (expertise) ‘a Siaosi Pohiva ‘oku ne fehu’ia ai ‘a e tu’unga taau ‘o e EQAP.

2.    Ko e fakafōtunga mo e natula ‘o e ngaahi ‘imeili ‘a Viola Ulakai ‘oku faka’uhinga ia ko hano ‘ohofi pe tukuhifo ‘a e ngeia ‘o e Palēmia ka koe Ministā Ako pea uesia ai hono ongoongo lelei pehe ki he Potungāue. ‘Oku toe uesia heni ‘a e vā ‘o e Pule’anga mo e SPC pea ‘oku ‘i ai ‘enau tui koe sipinga ko’eni ko hano ‘ohofi faka-taautaha ‘a e Palēmia ka ‘oku ‘ikai koe taumu’a ma’a e Letiō Tonga.

3.    'I he'enau vakai koe ‘imeili ‘a Viola Ulakai ko hono ‘ohofi ‘a e ngaahi fokotu’utu’u fo’ou (reforms) ‘a e Potungāue Ako ‘a ia ‘oku ‘ikai ha’a ne kaunga kiai ko e tokotaha ngāue ‘a e Letiō Tonga pea;

4.    Ko e ‘imeili ‘a Viola Ulakai ‘o pehe ‘oku ne fakafofonga’i ‘a e Tonga Media Council ‘oku loi ia he ‘oku ‘ikai ha manako ‘e taha ‘a e Kosilio Mitia he kaveinga ko’eni pea na’e ‘ikai fakangofua ia ‘e he Tonga Media Council ke ngāue’aki 'a e hingoa ‘o e Kosilio ke fakahoko ‘aki e ‘ohofi fakafo’ituitui kuo fakahoko ‘e Viola.

Ko e ngaahi ‘uhinga ‘eni na’e ‘oatu ‘e he Minisitā ki he Poate pea na’e fakapipiki atu ai pe mo e tohi ‘a e Palēmia ‘o e ‘aho 13 ‘o ‘Epeleli ‘o fokotu’u ke tuku ki tu’a ‘a Viola Ulakai. Neongo na’e ‘ikai faka’asi atu ‘i he tohi ‘a e Minisitā ki he Poate ka koe tu’utu’uni pe ia 'i he anga maheni ke aofangatuku ‘aki 'e he Poate 'a e kau Talēkita 'o e Komisoni Fakamafolalea 'a Tonga. Ko e tuku fakataimi foki 'eni ki tu'a ka e fakahoko ha fakatotolo.

Ko ‘ene toki hoko ‘eni ‘i he fonua ni hano tuku ki tu’a ha Faiongoongo ‘i ha fokotu’u fakahangatonu mai mei he Palēmia. ‘Oku mahino foki ‘oku fakahoko ‘a e ngāue fakalao ki he tu’utu’uni ko ‘eni pea kuo kamata ke ‘asi mai ki mu’a ‘a e ngaahi Kautaha Ongoongo mo e kau Faiongoongo 'o fakahalaki 'a e tukuaki'i 'o Viola pehe ki he Ongoongo Tukuatu 'e ua 'a e 'Ofisi 'o e Palēmia.

Ko e 'uluaki Ongoongo Tukuatu he 'aho 15 'Epeleli 'o tukuaki'i na'e 'ikai ke fakangofua 'e he Kosilio Mitia (Tonga Media Council) 'a Viola kene fakafofonga'i kinautolu. Ko e Ongoongo Tukuatu hono ua na'e fa'u ia 'e he 'Ofisi 'o e Palēmia pea pulusi mai 'i he sila mo e fometi 'a e Pule'anga 'i he 'aho 20 'Epeleli 'o fakahā Ongoongo Tukuatu 'a e Tonga Media Council 'o faka'ikai'i 'e he Sea Luseane Luani 'a hono ngaue'aki 'e Viola 'a e hingoa 'o e Kosilio Mitia 'a Tonga (Tonga Media Council).

'Oku 'ikai ngata heni ka 'oku fehu'ia hono fakahoko mai 'a e Ongoongo Tukuatu 'a e Kosilio Mitia 'a Tonga (Tonga Media Council) 'i he sila mo e fometi Ongoongo Tukuatu 'a e 'Ofisi 'o e Palēmia 'o ho'ata mei heni 'oku pule'i pe 'a e ongoongo mei he Pule'anga 'o fakafou mai he 'Ofisi 'o e Palēmia.