Kuo mau pehē kuo CEO ‘a Claude Tupou he Potungāue Ako: Ngali hifo mai ha ‘Angelo ki he Lakanga ni? ^Featured

Neiafu
Vava’u

31 Ma’asi, 2016

Tangata’eiki,

Fakamolemole kae tu’u atu mu’a ‘eku ki’i fakahoha’a ni fekau’aki mo hono tataki kimautolu ko’eni he Potungāue ‘oku taku ‘oku mau tutu e maama ki he fonua pe koe Potungāue Ako. ‘Oku ‘ikai temau toe ‘ilo pe koe fē koaa ‘a e me’a ‘oku a’u kiai ‘a hono fakalele homau vaka he ko e fetongi tu’o fiha ‘eni ‘a e le’ole’o ‘i he lakanga CEO.

Na’a mau fanongo he ngaahi mītia kuo fokotu’u tu’uma’u ‘a Claude Tupou ki he lakanga ni hili ia ha tu’utu’uni ‘a e Va’a ‘oku fakahoko kiai ‘a e tangi ‘i he PSC pea na’a mau fiefia ‘i he’emau ‘ilo kuo ikuna e pule ‘a e lao mo e tu’utu’uni ngāue ka ta koaa ia na’e ‘oatu pe ‘a Claude ia ke le’ole’o he lakanga kae fa’o puha ‘a e fokotu’u ia ‘a e PSC fakatatau ki he lao.

‘Oku mahino pe ia ‘oku ‘i ai e mafai kiai ‘o e Minisitā Ako ka ko’ene tali koaa kae ‘oua kuo fuhu e Potungāue ‘i he fa’ahinga fokotu’utu’u pehe ni. Kuo toe ongona mai he ngaahi ongoongo kuo foki hifo ‘a Claude Tupou ia ‘o Tokoni CEO kae hoko hake ‘a Ponapate Taunisila ki he lakanga CEO. Ko e CEO le’ole’o ‘aki ‘eni hono 4 hili ‘a e malōlō ‘a ‘Emeli Pouvalu pea 'oku 'ikai ho'ata mei heni ha ma'opo'opo he 'oku fo'ou 'ene hoko he ngaahi 'aho ni.

‘Oku ‘i ai leva ‘a e fehu’i ‘oku nofo ‘i he’emau fakakaukau pe ‘oku ‘ikai koaa ha taha ia ‘e fe’unga ki he lakanga ni ‘i Tonga ni mo ‘etau kakai ‘i he Pasifiki?. Kapau leva ‘oku ‘ikai fe’unga ha taha pea ‘oku totonu ke uki e Potungāue ke fai ha uike lotu ‘o kole ha ‘Angelo ke hifo mei langi ‘o tongia e fatongia ni he ‘oku ‘ikai fe’unga ha taha ia ‘i he fonua.

Kapau leva ‘oku toe ‘i ai ha ‘uhinga kehe pea ‘oku matamata tonu ‘emau fifili pe koe tuai hono fili ha CEO kae faingofua ‘a e fokotu’utu’u faka lautohi Pule’anga ‘a ‘emau Minisitā mo ‘ene fanga pone ‘oku lolotonga fakahoko ‘i he Potungāue. ‘Oku mau faka’amu ke mahino ki homau Taki pea ke 'oua mu'a 'e tuputamaki ka ko e fokotu’utu’u ‘oku ne fakahoko ko hono veuki ‘ata’ataa pe ‘a e Potungaue na’a mau anga ki ai ‘i he maau mo hono toka’i  ‘i Tonga ni mo muli pea na’e hohoko mai ‘a e kakai ‘iloa mo tu’unga fakaako ma’olunga na’a nau leleaki’i mai ‘a e maa’imoa ni.

Ko e me’a pe ‘oku mau ‘ilo he taimi ni koe launga ‘a e tokolahi taha ‘o e kau tauhi fānau pea mo e ngulungulu fei’umu ‘a e kau ngāue . Na’a mau fiefia ‘i he ongoongo ki hono fokotu’u ‘o Claude Tupou ki he lakanga CEO he koe tangata lelei ‘eni mo taukei ka koe me’a mahu’inga ko hono fakapapau’i aa ha taha ki he lakanga ni. 'Oku mau lotolahi ke mau lea 'o fakahā 'emau fakakaukau neongo hono lolo kimautolu. ‘Oku mo’oni e kananga koe lahi ange ‘a e kau heu ‘o e supo ‘e liliu leva ia ‘o hopi pea ‘e konaa ai pe Potungāue mo e kau ngāue kae ‘oua kuo hoko mai ha Pule’anga fo’ou.

Faka’apa’apa Atu,

Faiako Lolo Mo’oni