Ko e ha 'a e 'uhinga hono ta'e 'Atita'i Komisoni Fakamafolalea 'a Tonga 'i he ta'u 5 fakafuofua mei he 1996-2001 Featured
'Eliesa Fifita & 'Ahongalu Fusimalohi
KOEHA 'A E 'UHINGA 'O E TA'E-'ATITA'I E KOMISONI FAKAMAFOLALEA TONGA 'I HE TA'U 'E 5 FAKAFUOFUA MEI HE 1996-2001
17 Ma'asi, 2016.
Tohi ki he 'Etita
Neputuno
Nuku'alofa
Tangata'eiki/Fine'eiki,
'Oku ou tui ta'e-toeveiveiua 'oku totonu ke 'omi 'e he Pule'anga lolotonga 'a e fakamatala 'Atita ki he tu'unga fakapa'anga 'a e Komisoni Fakamafolalea Tonga 'i he vaha'a ta'u 'o e 1996-2001.
Ko e fakamatala mahu'inga ia ki he Mitia 'a e Pule Malolo 'o e Komisoni ko 'Elenoa 'Amanaki 'aia na'a ne fetongi atu 'a Tavake Fusimalohi 'i he 2002.
'Oku mahu'inga ketau 'ilo ki he 'uhinga na'e ta'e-'atita'i ai 'a e vaha'a taimi koeni, pea 'oku totonu ke fakamole tatau pe 'a e Pule'anga lolotonga ki hono hakule 'o e me'a ni, pea mo'enau fakamole ki hono hakule 'o e ngaahi fakatau paasipooti 'oku nau tukuaki'i ki he ngaahi Pule'anga kimu'a.
Kuo lea 'a e ni'ihi 'o e kaungaue malolo 'o e Komisoni 'o fai ha ngaahi tukuaki'i fakalilifu, kau ai 'a e tukuaki'i na'e 'iai e ngaahi fakamole 'a e Komisoni ki hono langa 'o e falenofo'anga (residence) 'o e pule, hange ko hono totongi 'o ha ngaahi koniteina naunau langa.
Na'e kau ai mo e felekeu 'a e ma'u'anga pa'anga lelei 'a e Komisoni na'e ngaue'aki 'i he kuohili, ko e higher purchase loan. Ko e loan pe ko e no 'a e kaungaue fakapule'anga mei he ngaahi naunau faka'elekitolonika 'a e Komisoni, pea toki totongi fakafoki, to'oto'o pe mei he vahe 'a e kaungaue fakapule'anga 'o hu ki he Account 'a e Komisoni.
Na'e mahino 'i he ngaue 'a e 'Atita na'e 'iai 'a e va'inga 'i he ma'u'anga pa'anga lelei koeni 'a e Komisoni pea iku 'o fakangata 'a e faingamalie koeni.
'Oku totonu ke tali ui mo 'Ahongalu Fusimalohi ki he ngaahi palopalema koeni, he na'a ne Tokoni Pule 'i he taimi 'e taha 'o a'u ki he ta'u 2001 kimu'a pea ne fakafisi mei he Komisoni. Pea 'oku totonu ke fakamatala ki he fonua, pe kofe 'a e $8 miliona na'a ne fakaha na'a na 'osi mo Tavake mei he Komisoni na'e fakahu ko e pa'anga ngaue 'a e Komisoni Fakamafolalea Tonga.
Koeha nai 'a e 'uhinga tefito na'e kei vilitaki aipe 'a e Minisita 'o e Potungaue Ki He Ngaahi Pisinisi 'a e Pule'anga, Hon. Poasi Tei, ke fokotu'u 'a 'Ahongalu Fusimalohi ke ne hoko ko e Talekita Poate 'o e Komisoni Fakamafolalea Tonga?
Faka'apa'apa atu,
Eliesa Fifita
