Totonu ke Fakafisi leva ‘Ahongalu Fusimalohi mei he Poate Komisoni Fakamafolalea Tonga Featured
Totonu ke Fakafisi Leva ‘a ‘Ahongalu Fusimalohi mei he Poate Komisoni Fakamafolalea Tonga.
Kolomotu’a
Nuku’alofa,
12 Ma’asi 2016.
Tangata’eiki,
‘Oku ou faka’apa’apa mo fakahoko atu he tohi ni ‘a ‘eku fokotu’u kia ‘Ahongalu Fusimalohi ke fakafisi leva mei hono lakanga ko e Talēkita ‘o e Poate Komisoni Fakamafolalea ‘a Tonga. ‘Oku makatu’unga ‘eni ‘i he ‘uhinga ‘oku mahino ngofua ‘a ia ko ‘ene Takihala’i mo Lohiaki’i ‘a e kakai ‘o e fonua. Na’e faka’eke’eke ‘a e matāpule ni ‘e he Leito 87.5 ‘a Katalina mo Maka Tohi ‘e Luseane Luani pehe ki he Leitō Tonga ‘e Viola Ulakai pea na’a ne fakahoko ai ‘a e fo’i fakatuputupulangi ‘a ia ‘oku kei hēhē’ia ai ‘a e fonua.
Ko ‘ene fakahā ‘eni na’e ‘i ai ‘a e pa’anga ‘e $8 Miliona na’e tanaki ‘o seivi kimu’a pea ne mavahe mo ‘ene tangata’eiki Tavake Fusimalohi mei he Komisoni Fakamafolalea ‘a Tonga. Na’e fakahoko foki ‘i he uike hono hoko hili ‘a e ongo fo’i faka-tuputupulefanua ko’eni ‘a ‘Ahongalu ‘a hono faka’eke’eke ‘e he kau faiongoongo ‘a ‘Elenoa ‘Amanaki ‘a ia koia na’a ne fetongi mai ‘a Tavake Fusimalohi ‘i he lakanga pule ‘o e Komisoni ‘o mahino mei ai koe fo’i mohe misi ‘ata’ataa pe ‘eni ia ‘a ‘Ahongalu.
Na’e toe fakahoko mo ha faka’eke’eke ki he Komisoni fekau’aki mo e ngaahi ‘akauni kuo ‘atita’i ‘a e Komisoni ‘o mahino mei ai na’e ‘ikai ha pa’anga ‘e 8 miliona ia. Ko e me’a tatau na’e fakamatala kiai ‘a Viola Ulakai lolotonga ia ‘ene faka’eke’eke ‘a ‘Ahongalu ‘o mahino na’e ‘ikai ‘ilo ‘a e kau ngāue ia ki ha pa’anga lahi pehe.
‘I he’ene pehe leva ‘Etita ‘oku ou fai ‘a e tohi ni mo e fokotu’u kia ‘Ahongalu Fusimalohi ke fakafisi leva he kuo ne lohiaki’i ‘a e kakai ‘o e fonua pea ‘oku ‘ikai ke ‘i ha tu’unga falala’anga kene ma’u ‘a e lakanga Talēkita ‘i he Komisoni ko’eni. ‘Oku ‘ikai fo’ou foki ‘a e ‘ikai falala’anga ‘a e matāpule ni pea ‘oku ‘ilo kiai ‘a e kakai ‘o e fonua.
‘Oku ‘i ai ‘a e ‘amanaki ‘e tali lelei ‘e ‘Ahongalu ‘a e fokotu’u ko’eni he ‘e kau lelei ki hono falala’anga ‘o e Pule’anga mo ;ene ngaahi Poate.
Faka’apa’apa Atu,
‘Eliesa Fifita
Kolomotu’a
