‘Oku ‘ikai fakafofonga’i ‘e he Kau Felāfoaki ‘a e Kakai ‘o e Fonua Featured
‘Oku ‘ikai fakafofonga’i ‘e he Kau Felāfoaki ‘a e Kakai ‘o e Fonua
24 Fepueli, 2016
‘Etita
Nepituno Tonga Online News
Nuku’alofa,
Tangata’eiki,
Fakamolemole mu’a kae tu’u atu ‘eku ki’i fakahoha’a ni fekau’aki mo e kaveinga ‘oku ha atu ‘i ‘olunga. ‘Oku ou fanongo ma’u pe he polokalama felafoaki ‘i he Letio Tonga ‘o tatau pe mo e Letio ‘a Katalina pea ‘oku ou fakatokanga’i ai ‘a e me’a ko’eni;
1. Ko e kakai tatau pe ‘oku nau telefoni ki he felafoaki he meimei ‘aho kotoa pea malo ka toki kau atu kiai ha toko 2 pe 3 fo’ou he ‘aho.
2. ‘Oku ‘osi mahino pe ‘a e fa’ahi ia ‘oku tui kiai ‘a e kakai ko’eni pea koe maumau taimi ha toe fale’i atu tautau tefito ki he ngaahi kaveinga politikale.
3. ‘Oku ‘ikai kenau fakafofonga’i ‘enautolu ‘a e kakai tokolahi taha ‘o e fonua he ‘oku mo’ua e tokolahi ia he fai ‘enau ngaahi ngaue ‘oku nau mo’ua kiai.
4. Kuo ‘osi atu ‘a Lavaulavu ka na’e ‘i ai ‘a e kakai pau ia mahalo koe toko 3 ki he 5 ko ‘enau me’a ‘oku fai ko e telefoni ‘o hiki pe ‘a Lavulavu ‘a ia ‘oku fai e mahalo ko hono famili ‘oku ne kumi ha’anau kaati ke fai me’a tatau he ‘aho kotoa mo e le’o tatau.
5. ‘Oku si’isi’i ke a’u ‘a e tu’unga mahino ‘a e falukunga kakai ko’eni ki he ngaahi kaveinga pea iku ki he’enau toe takihala’i ‘a e kau fanongo.
‘Oku ou ‘oatu pe 'eku fakakaukau ke fai ha vakai kiai he ‘oku fa’a me’afua ‘aki ‘e he tokolahi ‘a e ngaahi felafoaki ko ‘eni koe loto ia ‘o e fonua pea ‘oku a’u pe foki ki he kau Fakafofonga Falealea mo e Kau Minisita ‘oku nau ‘ohake 'i Falealea koe loto ‘eni ‘o e kakai ‘oku ‘oatu he felafoaki ka ‘oku ‘ikai ke mo'oni 'eni.
'E 'ikai malava 'e he toko 10 ki he 15 'o fakafofonga'i atu 'a e le'o 'o e kakai 'o e fonua he koe kakai tatau pe he 'aho kotoa 'oku nau telefoni ki he felafoaki.
Faka’apa’apa Atu,
Tongofionoa
