Report comment

'Oku 'ikai foki ko ha me'afo'ou ka ko e me'amotu'a pe hono toutou fai ma'u pe 'e Samuela 'Akilisi Pohiva 'a e me'a ko e ngutungutuua mo e ninenimaua 'a ia 'oku lolotonga 'ene lea'aki mo fai 'a e me'a 'e taha 'oku ne to e liliu ia 'o le'aki mo fai 'e ia 'a e me'a 'e taha 'o hange ko e me'a 'oku lave ki ai 'a e Minisita malolo mo e Temokalati tutuku ko Sunia Fili.

'Oku tatau fakasosiale mo fakapunake 'a e ngutungutuua mo e nimeninaua mo e loi, kaka mo e siokita ka e tatau 'a e ngutungututaha pe ngutungututatau mo e nimenimataha pe nimenimatatau mo e mo'oni, totonu mo e 'ofa fonua mo e kakai.

Na'e hoko 'a e feingavale 'a 'Akilisi ke to'o faka'aufuli 'a e mafai 'o e Tu'i mo e Hou'eiki mo e fa'unga tupu'a (tauhifonua, matapule, 'ulumotu'a, fahu moe ha fua) ke to e afuhia ai mo e talatukufakaholo 'o e fonua 'o hange ko 'ene feingatavale ke veuki mo haveki 'a e tala mo e fonua 'o kau ai 'a e fasi fakafonua, ngaahi fungavakalea (Tu'i, Hou'eiki mo e Kakai), mo to e ta'ofi 'a e ta'ovala mo e lea faka-Tonga mo e ngaahi faiva faka-Tonga (ko hono ngaue'aki 'a e fakatapu tokua) pea tuku mo e faifatongia pe fuakaveinga he nofo-'a-kainga, nofo-'a-ha'a mo e mo e nofo-'a-siasi moe ha fua.

Na'e fua poupou malohi 'a e kakai mahu'inga 'o e fonua 'o hange ko e kau tu'ukimu'a mo tu'umu'a he ako, fonua, lotu mo e pisinisi ki a 'Akilisi he'enau tui ko e me'a lelei 'a e tau'ataina ('o hange pe ko e popula na'e fua tau'i 'e Taufa'ahau) ma'ae fonua mo e kakai ka e mahino mai pe 'ene ta'efieauna, ta'efaka'apa'apa mo e ta'etoka'i pea pehe ki he'ene loi, kaka mo e siokita pea nau mavahe kotoa leva he vavetaha.

Na'e toki hu mai leva 'a e fa'ahinga ko 'eni 'oku nau lolotonga muimui, fakakonahi mo fakakuihi 'e Samuela 'Akilisi Pohiva 'o afuhia he loi, kaka mo e siokita ppea mo e ta'efieauna, ta'emangoi mo ta'e'atamai 'a ia na'e 'ikai fu'u mahino fefe fau ha'anau poupou kimu'a ki he temokalati he laumalie 'o e tau'ataina 'o kau ai 'a e ngaahi konivesio he konisitutone mo e temokalati ko e kaka mo e siokita pe ma'a kinautolu ka e 'ikai ko e lelei fakalukufua 'a e fonua mo e kakai mo Tonga.