“ Malo mu'a 'Eliesa hono ke i tauhi hotau ha'ofanga mo e matanga ka e tuku pe mu'a ke fai ha huhumama he kaveinga kuo tala mo fakaha mei he 'Ofisi 'o e Prime Minister (PM) mo e Pro-Democrat (PD) ki mu'a ka e PM ki mui!
'Oku 'i ai 'a e lea paloveape faka-Tonga ko e "hange ha limu 'oku tu'u i 'au" 'o 'uhinga ka tafe 'a e 'au mei he ko 'ena malele fakataha ai pe pea ka tafe 'ae 'au mei he ko 'ena malele fakataha ai pe.
'Oku to e 'i ai mo e lea poloveape faka-Tonga ko e "fakalanulanu 'o hange ha feke" 'o 'uhinga ki he feliuliuaki 'a e lanu 'o e feke ke lanu tatau mo hono 'atakai ko e founga ke ne malu'i ia mo 'ene mo'ui mei he fili.
'Oku to e 'i ai mo e lea paloveape faka-Tonga koe "kehe 'a e lea he hake pea kehe 'a e lea he hifo" 'o 'uhinga ki ha taha 'oku ne taukave ha 'uhinga 'e taha pea to e liliu ia 'o taukave ha 'uhinga 'e taha.
'Oku pehe tofu pe ko e liliu 'a e 'Akilisi Pohiva ko e Pro-Democrat (PD) ki he 'Akilisi Pohiva ko e Prime Minister (PM) 'o "hange ha limu tu'u he 'au," "fakalanulanu hange ha feke" mo "kehe 'a e lea he hake pea kehe 'a e lea he hifo."
'Oku 'uhinga kotoa 'a e ngaahi lea paloveape faka-Tonga ko 'eni ki ha taha 'oku 'ikai nofo ma'u ha feitu'u mo ha fakakaukau ka 'oku heke mo takai mo vilo holo mei he feitu'u mo e fakakaukau 'e taha ki he feitu'u mo e fakakaukau taha.
'Oku tefito 'ene heke mo vilo takai holo ko e sio pe ki loto ki a kita (siokita, ta'e'ofa mo e kaka) ka e 'ikai ko e sio pe ki tu'a ma'ae kakai 'o e fonua (siokitu'a, 'ofa fonua mo e faitotonu). 'Oku mahino lelei leva 'ene heke mei he 'Akilisi Pohiva ko e PD ki he 'Akilisi Pohiva ko e PM 'o tumutumu he'ene heke mei he DEMOCRACY (pule 'a e tau'ataina) ki he AUTOCRACY (pule fakatokotaha, fakatikitato, fakaaoao mo fakapopula).
'Oku to e 'asi lelei 'eni he heke 'a e PM mei he RULE OF LAW (pule 'a e lao) ki he LAW OF THE JUNGLE (lao 'a e vaota mo e fanga manu fekai) 'o to e heke mei he PULE LELEI (good governance and good leadership) mo e 'ATAKITU'A, TALIUI, VAHE TATAU mo e FAKAMAAUTOTONU ki he PULE KOVI (bad governance and bad leadership) mo e SIOKITA, TA'EFAKALAO, TA;EFIEAUNA mo e TA'ETOKA'I mo e ha fua.
'Oku tukuhua'aki 'e he takaua 'o e PM 'oku iloa ko 'Etuate Lavulavu "ko e malie tokua pea to e lelesoni 'ape!" 'Oku malie mo oli mo lelesoni nai 'eni pe 'oku ta'ehuni mo ta'eoli mo'oni mo to e ta'e'ofa lahi? ”