“ Mata 2pou:
'Oku mo'oni e lau koe me'a fakafo'ituitui pe 'ae fe'auaki moe tono mali, moe ngaahi alaame'a pehe, kapau 'oku ke nofo pe homou 'api 'o fai ai ha'o pisinisi 'oku lesisita pe ho hingoa ke ma'u ai e lelei ma'au mo ho famili. Koe tupu pe mole 'a ho'o pisinisi koia ko ho tufakanga pe 'o 'ou!
Ka koe momeniti pe 'oku ke ta'utu ai he sea 'oe Tokoni Palemia, 'oku ke mavahe mai kei he siakale fakafo'ituitui ki he siakale fakafonua 'a ia 'oku ne fakataha'i kotoa e sosaieti Tonga, pea 'oku taau leva ke ke talangofua ki he ngaahi tu'utu'uni ngaue mo fai e fatongia ki he tu'unga fakamatapule ma'olunga taha ''oku ala lava.
'Ihe taimi 'oku ke hoko koe Tokoni Palemia, 'oku te hoko koe fofonga 'oe fonua ki mamani. Taimi lahi 'oku te hoko koe fakafofonga ''o, Ene Afio, 'oe Palemia, kau Nopele, pea moe kotoa e kakai e fonua. Koe vakai mai 'a mamani ki a te kita, 'oku 'ikai ke te fotu atu ko kita (fakafo'ituitui) ka koe FONUA ko Tonga!
'I he taimi 'oku te Tokoni Palemia ai, ko 'ete to'onga kotoa 'oku hoko ia koe sipinga ke fai kiai e fa'ifa'itaki mo fuatautau kiai e toenga e fonua.
Ko e ngaahi 'uhinga 'ena 'oku fai ai e hoha'a he 'oku 'ikai koe Siaosi Sovaleni fakataautaha 'oku fai kiai e tokanga ka ko Siaosi Sovaleni koe Tokoni Palemia 'o Tonga, ka ko hotau fofonga ki mamani moe sipinga ki Tonga kotoa.'Oku mau lave'i pe e tu'unga fakalao,'oe me'a ni ka 'oku fai e tokanga ki he tu'unga ma'ulalotaha kuo tau a'u kiai he tu'unga fakamolale. ”