Kauatu Minisitā Mo’ui Fakataha Komiti Fokotu’utu’u Konifelenisi Fakamamani Lahi Hono 9: Tokangaekina ‘a e Mo’uilelei Featured
Dr. Saia Piukala
Nuku'alofa, 22 Siulai 2015. ‘Oku lolotonga me’a atu ‘a e ‘Eiki Minisitā Mo’ui, Dr Saia Ma’u Piukala ke kau ‘i he Fakataha ‘a e Komiti Fokotu’utu’u ki he Konifelenisi Fakamamanilahi hono 9 ki hono tokangaekina ‘a e mo’uilelei´ ‘a ia ‘oku fakahoko ki Beijing Siaina ‘i he ‘aho 23 ‘o Siulai 2015.
Ko e taumu’a ‘o e fakataha ko eni´ ko hono fokotu’utu’u mo alea’i ‘a e ngaahi ‘asenita ki he fakataha lahi hono 9 ki hono tokangaekina ‘a e mo’uilelei ‘a ia ‘oku ‘amanaki ke fakahoko ‘i Novema 2016 ‘i Shanghai, Siaina. Ko e kaveinga ‘o e fakataha fakamamanilahi ko eni´ ko e “Tokangaekina e Mo’uilelei´ ‘i he Ngaahi Taumu’a Fakalakalaka” pea ‘oku fokotu’utu’u ia ‘e he Kautaha Mo’ui ‘a Mamani (WHO) pea mo e Komisoni ki hono Fakakaukau’i ‘o e Famili ‘a Siaina.
‘Oku mahu’inga foki ‘a e kau atu ‘a Tonga´ni ki he fakataha´ni he ‘oku mahu’inga ‘a e fakatupulaki ‘a e mo’uilelei´, pea mo hono tokangaekinga ‘a e mo’uilelei hotau kakai mei he ngaahi mahaki ‘ikai ke pipihi. ‘Oku laka hake ‘i he tukuifonua ‘e 37 mei he Pasifiki´ ‘oku nau kau atu ki he fakataha´ni.
Ko e fakamole fakapa’anga ki he kau atu ‘a e ‘Eiki Minisitā Mo’ui ki he fakataha ni, ‘oku fua ia ‘e he Kautaha Mo’ui ‘a Mamani ‘o ‘ikai ha fakamole ki ai ‘a e Pule’anga Tonga´.
NGATA’ANGA
Tukuatu mei he:‘Ofisi ‘o e Palemia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644 Fax: (676) 23 888; Ngaahi Faka’eke’eke- Email: This email address is being protected from spambots. You need JavaScript enabled to view it.
