'A'ahi mai timi tafa fakasanisani mei ‘Aositelēlia ki Tonga ni ^Featured

Ko e timi tafa ko’eni ‘oku tuku mai ia ‘e he kautaha tokoni koe Interplast pea ‘oku nau ‘ave ‘a e ngaahi timi kenau fakahoko ‘a e ngāue faka-Samaletani ko’eni ‘i he ngaahi fonua ‘o ‘Esia mo e Pasifiki 'o 'ikai ha totongi.

‘I Tonga ni foki ‘oku faingata’a ke ma’u ‘a e faingamalie ki he tafa fakasanisani ‘o makatu’unga pe ia ‘i he masivesiva ‘a e Falemahaki pehe ki he tu’unga faka-‘ilo mo faka-me’angāue ‘oku ‘i ai ‘a e fonua.

Pea 'oku hoko foki 'a e 'a'ahi mai ko'eni 'a e timi ni koe fakakoloa ki he kakai 'o e fonua 'oku 'ikai ke malava kenau ma'u 'a e ngaahi sevesi faka-faito'o ko'eni 'i Tonga ni.

‘E kamata ngāue ‘a e timi ni ‘i Tonga ni ‘i he uike faka’osi ‘o Fepueli pea ‘oku faka’ai’ai foki ‘a kinautolu ‘oku nau fiema’u ‘a e sevesi ta’e totongi ko’eni ki he mo’ui ke puka leva ha’anau apoinimeni ‘i he Falemahaki Vaiola.