“ 'Oku ou fakafofonga'i atu e TDF ke fai pe ha tali (response) nounou kihe ngaahi fakamatala 'a Dr. Sione Latu. 'Oku 'oatu e faka'apa'apa lahi kia Dr Latu moe Potungaue Mo'ui. Koe ngaue lahi 'oku nau fai he 'aho kotoa ke tokonia si'otau kakai. Kae me'apango ko 'etau masiva moe si'isi'i 'etau 'ilo 'oku tau kei 'i he tu'unga ma'ulalo ai he ngaahi 'aho ni.
'Oku ou tui he'ikai ke fu'u 'aonga ha toe fakafekiki he ngaahi fika moe ngaahi 'uhinga he 'oku fiema'u ke tau nague'i ke 'oange ha faingamalie 'oe mo'ui ki ha ni'ihi 'oku nau fiema'u 'i he taimi vave taha te tau ala lava.
Kuo 'osi maau e TDF he ngaahi tafa'aki kotoa ke fai e ngaue ni moe fait'o'o ni 'i Tonga 'o a'u kihono tali e ngaahi fehu'i kotoa pe ne 'omai mei he Potungaue Mo'ui, tukukehe pe 'ae ki'i seniti ke fai'aki. Koe me'a ne fiema'u 'e he TDF mei he Potungaue Mo'ui koe ki'i tohi 'o pehe 'oku nau poupou ke fai e faito'o taialasisi 'i Tonga ni. Ko ia pe.
Koe fiema'u ia 'ae kau fie tokoni pa'anga (Donors) lalahi 'oku nau fie tokoni ki he kakai masiva hotau fonua. Ne te'eki ai ke kole 'ehe TDF ha tokoni fakapa'anga mei he Pule'anga Tonga pe Potungaue Mo'ui he kuo mau 'osi lave'i 'etau faingata'a'ia fakapa'anga hotau fonua. Koe palani 'ae TDF ke fai e fakapa'anga 'oe Taialasisi 'i Tonga ni mei tu'a pea mei muli.
Na'aku toki foki mai 'eni mei 'Amelika (USA) pea neu kau atu ki he Konifelenisi lahi fakata'u 'ae Taialasisi 'a 'Amelika. Ne mahino ai 'oku tokolahiange 'ae kakai he taimi ni 'oku nau mafuli mo fili ki he faito'o Peritoneal Dialysis ko 'ene ma'ama'aange pea toe faingofuaange. 'Oku mahino 'aupto pe ko 'Amelika (USA) 'oku ha'u mei ai e ngaahi tekinolosia fakamuimui taha 'oe fa'ahinga faito'o ko 'eni. Koe palani loloa 'ae TDF 'e a'u pe kihe tu'unga 'e ta'etotongi e faito'o ni ki he kakai e fonua. Koe faito'o ki he HEMO Dialysis 'oku 'osi 'ihe palani pe ia 'ae TDF pea kuopau ke fakahoko ia 'ihe kaha'u vave mai.
Kuo mahino 'aupito e tu'unga 'oku 'iai e Pule'anga Tonga mo 'etau Potungaue mo'ui pea 'oku fai e faka'apa'apa lahi kiai. Ka 'oku lolotonga hoko atu pe 'ae feinga 'ae TDF 'i he ngaahi tafa'aki kehekehe ke lava 'o fai e faito'o ni 'i Tonga ni ke lava 'o si'i fakamo'ui ai ha ni'ihi.
Koe mo'ui 'e taha 'oku mate he fonua si'isi'i ko Tonga, koe mate ia 'ae tokolahi. 'Oku lolotonga tokoni'i 'e he TDF 'ae tokotaha 'oku lolotonga taialasisi 'i Fisi pea kuo ne mo'ui pea koe fakakoloa ia kiate kimautolu. Koe tokotaha ko 'eni 'e foki mai ki Tonga ni 'o hoko atu 'ene faito'o taialasisi he Peritoneal.
Faka'apa'apa atu,
Saia Moehau moe Tonga Dialysis Foundation ”