Fakama’ala’ala ki he feinga ‘a e Pule’angá ke langa ha Mala’e Tāpulu ki he Sipoti Pasifiki 2019. Featured
“Fakama’ala’ala ki he feinga ‘a e Pule’angá ke langa ha Mala’e Tāpulu ki he Sipoti Pasifiki 2019.”
Koe’uhí na’e te’eki ke ma’u ha konga kelekele lahi mo fe’unga ke teuteu’i ke hoko ko e mala’e tapulu ki he Sipoti Pasifiki ‘o e 2019, na’e me’a atu ai ‘a e ‘Eiki Palēmia, Samuela ‘Akilisi Pohiva ‘o fakataufolofola ki He’ene ‘Afió, Tupou VI, ‘o kole na’a faingamalie hono tofi’a ‘i he ‘Afio’anga ko Vila ‘i Tufumahina ke langa ai ‘a e mala’e tapulu.
Na’e fakamahino ‘e he ‘Eiki Palēmia, na’e tali ‘e he ‘Ene ‘Afio ‘a e kolé, ka na’e fakahoko kiate ia ke feme’a’aki ki ai mo Ratu Tevita Mara mo Lord Luani. Na’e fokotu’u leva ‘e he Palēmia ‘a Lord Ma’afu, Minisitā Fonua ke ne hoko atu ‘a e ngāue mo Ratu Tevita Mara mo Lord Luani.
Na’e fakahoko ‘e Lord Ma’afu ki he Palēmia ‘a e ola ‘o e ngāue na’a nau faí, ko e tofi’a ‘i Kauvai ‘e saiange ke ‘ave ki ai ‘a e mala’e tāpulu. Na’e me’a ‘a e ‘Eiki Palēmia ke fakamahino ‘a e me’a ni, ‘o pehē:
“Na’e fai e lava atu ki Kauvai ‘o sio ki ai, sai ‘aupito he ko e ‘elia lahi pea ma’u ai e ‘eka ‘e 100 ‘a ia ‘e lava lelei ai ‘a e mala’e tāpulu luo ‘e 18. Ka na’e fai e sio koe’uhí ‘oku mama’o ‘a Kauvai, ‘ikai ha kolo ofi, fai e tokanga ki he malu (security) ‘a e kau tapulu pea ke faingofua e fononga ki ai ‘a e kakai, pea ‘e toe lahi ange ‘a e fakamole ki he ngāue ki ai, ko ia na’e toe fai e talanoa na’a ‘oku sai ange pe ‘a Vila. Na’e ‘i ai leva e fokotu’u ke fai ‘a hono maaka’i e ‘eka ‘e 100 ‘i Vila pea na’e ‘alu leva ‘a e kau ngāue mei he Pule’angá ke fai e ngāue ki hono maaka’i e ‘eka ‘e 100, ka na’e hoko e ta’efemahino’aki, pea na’e ta’ofi mai e ngāue ke toe vakai pē ‘a Kauvai. ‘E toe hoko atu pē e talanoa mo e ‘Ofisi Palasí, ka na’e fai e sio ki he Vila koe’uhi ko ‘ene ofi, tu’u’anga lelei, vāvāofi e nofó pea ‘e toe si’i ange ‘a e fakamolé. Ka ‘okapau ‘e hoko ai pē ke fai ki Kauvai, ko e malō hono ma’u e kelekelé he koe kelekele lahi ‘oku fiema’u.”
Ko e langa ‘o e mala’e tāpulu ki he Sipoti Pasifiki ‘o e 2019 ‘oku fiema’u ki ai ha kelekele ‘eka ‘e 100. Ko ia ‘oku kau ‘a e langa ‘o e mala’e tapulu ‘i he ngāue ‘oku tuai koe’uhí ko e kumi ‘o e kelekele lahi fe’unga he ‘oku si’isi’i ‘a e ngaahi ‘elia ‘e faingamālie. ‘Ikai ko ia pē, ka ‘e fiema’u ha taimi lahi ke fakahoko ai e langa ko ‘eni koe’uhí ko e ngāue ‘e fiema’u ke fai ki he konga kelekele ke fakakakato ‘a e naunau tefito ki ha mala’e tāpulu.
‘Oku fie fakamahino ‘e he Pule’angá, ko e teuteu ki he Sipoti Pasifiki ‘o e 2019 ko e ngāue lahi koe’uhí ke fakahoko ‘a e Sipoti ‘i he tu’unga faka’ofo’ofa pea polepole ai ‘a Tonga ni. ‘Oku ‘i ai ‘a e ngaahi mala’e sipoti mo e ngaahi naunau ‘oku fu’u fiema’u ke kamata leva ‘a e ngāue ki ai he taimi ni, pea ‘oku tokanga lahi ki ai ‘a e Pule’angá. ‘E a’usia pē ‘a e teuteu ki he sipoti ‘i he fengāue’aki lelei pea mo e fengāue’aki lahi ‘a e Pule’anga pea mo e ngaahi kupu kotoa pē hotau fonua ni.
-NGATA’ANGA-
Tuku atu mei he:‘Ofisi ‘o e Palēmia, Pule’anga Tonga, Nuku’alofa, Tonga.Tu’asila:Taufa’ahau Road, P.O. Box 62.Tel: (676) 24 644 Fax: (676) 23 888; NgaahiFaka’eke’eke- Email: This email address is being protected from spambots. You need JavaScript enabled to view it.
