‘A’ahi Faka-‘Ofisiale Palēmia ‘o Tonga ki Papua Niukini Featured
Palēmia 'o Tonga Samiuela 'Akilisi Pohiva lolotonga 'a e Sipoti 'a e Pasifiki 'i Papua Niukini 2015
Nuku'alofa, 17 Sanuali 2015. ‘Oku lolotonga folau faka-‘ofisiale ‘a’ahi ‘a e Palēmia ‘o Tonga Samuela ‘Akilisi Pohiva ki Papua Niukini
‘Oku ‘amanaki foki ke tu’uta ‘a e Palēmia mo ‘ene kau folau ki Port Moresby ‘a ia koe Kolomu’a ia ‘o Papua Niukini ‘i he taimi efiafi ‘o e ‘aho ni ‘aho Sapate ko hono 17 ‘o Sanuali 2016. Fakatatau ki he fakamatala ‘a e ongoongo One Papua New Guinea ‘oku ‘amanaki lelei ‘a e Palēmia ‘o Papua Niukini Peter O’Neil ke talitali lelei ‘a Pohiva ‘i he folau ko’eni.
Na’e toe fakahā foki ‘e O’Neil koe ‘a’ahi faka-‘ofisiale ange ko’eni ‘a e Palēmia ‘o Tonga tene fakamalohi’i ‘a e va fengāue’aki faka ‘ikonomika mo faka-tukufakaholo ‘a e ongo fonua. ‘Oku ‘ikai ngata heni ka ‘e malava kena fevahevahe’aki ‘a e ngaahi ‘ilo, taukei mo e fakakaukau fekau’aki mo e Sipoti ‘a e Pasifiki ‘a ia na’e fakahoko ki Papua Niukini ‘i he 2015 pea ‘oku ‘amanaki fakahoko mai ki Tonga ni ‘i he ta’u 2019.
‘Oku ‘amanaki foki ke tokoni ‘a e fevahevahe’aki ko’eni faka-fakamatala mo e ngaahi tokoni kehe pe ki he teuteu ‘a Tonga ki hono housi mo fakalele ‘a e Sipoti ‘a Pasifiki ‘i he ta’u 2019. ‘Oku toe ‘iai foki mo e ngaahi kaveinga kehe fekau’aki mo e ‘a’ahi ko’eni ‘a ia ‘oku kau ai ha fakataha moha alēlēa fekau’aki mo e kaveinga ‘o e toutai pehe ki he feliuliuaki ‘a e ‘Ea (Climate Change).
