Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

Tö Folofola Huufi 'e He'ene ‘Afió Tupou VI Faka’ali’ali Ngoue Vahe Fonua Ha’apai 2019 Featured

‘Ene ‘Afió Kingi Tupou VI ‘Ene ‘Afió Kingi Tupou VI

Ko e to folofola Huufi 'e he Tama Tu'i Tupou VI 'a e Faka'ali'ali ngoue Vahefonua Ha'apai ki he ta'u 2019.

Tapu mo e ‘Otua Mafimafí ko hono kolosí na’e tā fakamisiteli ‘i he vahe fonua ni

Tapu mo e Hou’eiki ‘o e fonuá

Tapu mo e Kau Minisitā ‘o e Kapinetí mo e Kōvana Ha’apaí

Tapu mo e Kau Taki Lotú

Tapu mo e Kau Tauhi Fonua mo Ha’a Mātāpule, kae’umā e tangata mo e fefine’i fonua Ha’apai ‘oku tau lōnuku he Mala’e Lea ‘a e Tohí ke faka’ali’ali ‘a e ola ‘o e ngāue ‘a e ‘Otu Ha’apaí ki he ta’u ní.

Ko e kaveinga To’u Kai Mo Hono Lohú ‘oku fekau’aki mālie mo e feliuliuaki ‘a e ‘eá ‘oku ne uesia kitautolu he ‘aho ni. Na’e hoko ia he katoanga’i hoku ‘ahó pea tupu mei ai ‘a e pau ke liliu ‘a e polokalamá ‘o fakatatau ki natula. Ko e fiema’u ki he ngoue ‘o e ‘aho ni ke toe lahi ange ‘a e pulopula kehekehe ki he fiema’u fakalotofonuá. ‘Oku tau lolotonga fe’ao mo e ngaahi faingata’a fakaenatula ka ‘i he taimi tatau pē ‘oku ‘i ai ‘a e ngaahi faingamālie ‘oku ‘omai ‘e natula hāngē ko e lahi ange ‘a e fua fakakomesialé.

Ko e feliuliuaki ‘o natulá ‘oku fehangahangai ia mo māmani kātoa, ‘oku ‘ikai ko Tonga pē ka ‘i he taimi tatau ‘oku tau vakai ki he ngaahi faingamālie ke tau ala ngāue’aki ki he lelei fakafo’ituituí, fakafāmili, fakakolo, fakavahe mo e vahe fonuá.

‘Oku ‘i ai ‘a e ngaahi faingamālie ‘i he kolo fakatautehina ‘a Ha’apai mo e kolo ko ia ‘i Siaina ko Dongguan. ‘Oku lava ke fakafou mai ‘i he fetu’utaki vāofi ko eni ‘a e ngaahi tokoní hāngē ko e vaka toutai, ko e palau, pea pēhē ki he’enau fie fakahoko ‘a e tokoni kehekehe ki he ngaahi ngāue ‘i Tonga ni kae tautefito pē ki Ha’apai.

‘I he vā fakatautehina ko eni mo Dongguan ‘oku ‘i ai ‘a e faingamālie kenau fakahoko ha fekumi makehe ki he toutaí pea ke tokoni ki hono fakatupulekina ‘a e ma’u’anga mo’ui mei ‘ōsení. Ko e fakatātā ki aí, lahi ‘aupito ‘a e ngaahi ‘ulu’ulu ‘o e vahe fonua ni pea pēhē ki he ola ‘o e toutai kehekehé. Ka ‘oku fiema’u foki ketau vakai’i ‘a e ngaahi faingamālie ke toe hiki ai ‘a e mahu’inga ‘o ‘etau toutaí.

Kapau ‘e ‘ave ‘etau tokangá ki he toutai’i mo’ui ‘a e me’atokoni mei tahí pea ‘e lelei ange mo ma’olunga ange hono mahu’ingá ‘i he toutai ‘oku tuku ‘aisí. Ko e fakatātā ki aí ko e ika ‘oku kei mo’uí ‘e fakatau atu ia ‘i he mahu’inga ‘oku mā’olunga ange ‘i he ngaahi fale kaí pea pēhē ki he ngaahi hōtele ‘i Tonga ni.

Ko ia, ko e lava pē ke fakahoko ‘a e founga ko ení ‘i he māketi fakalotofonuá pea ‘e lava leva ke hoko atu ‘a e toutai mo’ui ‘o e fua mei ‘ōsení ke uta ki muli pea ko hono ola fakapa’angá ‘e liunga lahi ange ia ‘i he fakatau fakalotofonuá.

‘E a’u pē ki ha taimi ‘e ‘ikai ke fiema’u ai ketau hiki ‘o nofo ‘i ha ngaahi fonua muli koe’uhí ‘e lava pē ketau ngāue pea ma’u pē e pa’anga lelei ‘i he tu’unga mo’ui ‘oku toe ma’olunga angé ‘i he nofo pē ‘i Ha’apai ni.

Ko e Vahe Fonua Tongatapú foki ‘oku lahi taha ai ‘ene fakahoko ‘a e tō mo e uta fakakomesiale ‘o e niú pea toki hoko leva ki ai ‘a Foa. ‘Oku tatau pē eni mo hono tō ‘o e hiapō. Fēfē leva kapau tetau tuku e konga lahi ‘o ‘etau tokangá ki he fua ‘oku lava ketau ma’u ai ‘a e ola ‘oku leleí.

‘E lava pē fakahoko mo ha fakalelei ki he founga ‘o e ngoue ‘oku tau anga maheni ki aí ‘i hano tō fakapisinisi ‘o hāngē ko e kavá pe hiapó ‘i he kamata ‘o e tō ta’ú. Ka ‘ikai ko e tō pē ‘o e ‘ufí ‘a ia ke ne to’o ‘e ia ‘a e vaha’a taimí a’u pē ki he ta’u ‘e taha pea toki hoko ‘a e utu ta’ú. Ko Ha’apai foki ‘oku ‘iloa ‘i he ngāue ‘a e kau fefiné ki he koloa fakatongá mo e lālanga fihú.

Ko e konga mahu’inga ‘o ‘etau fakatokanga’i ‘a e feliuliuaki ‘o natulá ko ‘etau fakapotopoto’i ‘etau founga ngoué. ‘Oku lahi ‘a e fanga ki’i ngoue iiki ‘i Ha’apai ni, ko ia ‘oku lava ke fakahoko ‘i Ha’apai ni ‘a e founga ngoue makehe ‘a e fonua ko Taileni. Ko e tō fakataha pē ‘a e ‘akau fuá, ngoue ‘oku fohá mo e vesitapoló fakahoko mo e faama’i ‘o e monumanú kau ki ai ‘a e puaká, moá, pató pea pēhē ki he faama’i ‘o e iká. Ko e founga ma’u’anga mo’ui eni ‘a e kau ngoue ‘o Tailení ‘a ia ‘oku nau ma’u mei ai ‘a e fua mo e ola lelei mei he konga kelekele fe’unga mo e vaeua ‘eka.

‘Oku mahu’inga ketau fakahoko ‘a e ngoué mo e toutaí ‘i ha founga fakapotopoto pea ke lava ketau tō ‘a e fa’ahinga fua kehekehe ke lava ketau matu’uaki ‘a e feliuliuaki ‘a e ‘eá pea ketau manatu’i ma’u pē ‘oku ha’u fakataha pē ‘a e liliú mo ha ngaahi faingamālie.

Kou fakamalo atu mo e talamōnū ki he ngāue kotoa kuo fakahoko ke lava ‘a e faka’ali’ali ‘o e fua ‘o e ngoué, toutaí mo e ngaahi koloa fakafonuá pea pēhē ki he takimamatá mo e folau ‘eve’evá mo e ngaahi ngāue’anga ‘a e vahe fonua ni.

Kou ‘ofa atu kia kimoutolu hono kotoa.

NGATA’ANGA

3 comments

  • Pouono
    Pouono Friday, 19 July 2019 13:43 Comment Link

    Malo mu'a Talofa (pea pehe kia Sifa he "Tangi e kalauni ..." moe "'Ikai mo'oni 'ae tukuaki'i ...") ho'o(mo) lahilahi nofo he 'isiu ('uhinga) ka e 'ikai koe soosi (sino) ko e ma'u'anga ia 'o e maama, mahino, melino moe maau (ka e 'ikai ko e tausoosi mo e tausino koe 'anaga ia 'o e fakapo'uli, ta'emahino, valau mo e felekeu. Na'e 'ohake 'a e 'uhinga malie mo ma'uhinga na'a ke lave ki ai he'emau faikava talanoa mo e matu'a na'e fehu'i ai 'e he taha 'o pehe, 'O kapau koe temokalati faka-Kailisi (mo fakaUesite) 'oku to'ofua mo to'okukui ta'etoefehu'i 'i Tonga ni (kae tautefoto kihe PM moe PTOA he'enau lotu kovi mo e taki kovi koe fehangahanagi moe tau'ataina pe temokalati na'e fua fokotu'u 'e he ongo helo ko Tupou I moe Misa Peka he'ena lotu lelei mo e taki lelei he konisitutone) 'oku 'uhinga koe pule'anga tokua 'a e kakai, fili 'e he kakai ma'ae kakai, pea ko e ha 'oku 'ikai fili kotoa ai 'e he kakai 'a e kau ma'u mafai fa'ulao (faslealea), mafai fakamo'oni lao (fakataha tokoni) mo e mafai fakahokolao (fakamaau'anga)? Tau faka'uta age ka fai ia 'o hange koe mafai fakahokolao (falealea) ko e fehu'i leva koe, 'E Tonga e pe te tau si'i 'ife 'ala mo si'i fefe 'ape? Na'e 'ikai nai na'e vaetolu lalahi 'e he ongo helo 'a e mafai he konisitutone ke nau ngaue tau'ataina (koe mafutefua 'oe temokalati) kehekehe takitaha ma'ae lelei fakataha, fakakatoa mo fakalukufua 'ae fonua, 'o 'uhinga 'oku ma'u 'a e "taha" mei he "kehekehe" (moe "kehekehe mei he taha?"

    Report
  • Lea pe á Ngaue
    Lea pe á Ngaue Thursday, 18 July 2019 20:26 Comment Link

    Poupou kakato fokotuú atu ke kau e tuúnga fakaako he filifili ki he kanititeiti Falealea. Óku fuú fakaófa e niíhi óku nau óho he pue ki he Fale ka óku íkai ko ha Fale tanakiánga taéako ka koe Fale ia ki he Kakai Poto ó e Fonua ke nau fokotuútuú e founga ke tau folaua. Ófa mai kau taéako takitaha ílo é kita á kita pea te álu ó ta toume mo to manioke kae tukuange Fale ki he kakai óku íai é ne kukukuku ki ai kae faingofua é tau folau.

    Report
  • Talofa
    Talofa Thursday, 18 July 2019 16:48 Comment Link

    Oku ou manumanumelie'ia ma'u pe he taimi 'oku ou lau ai ha To Folofola 'a e Tama Tu'i he 'oku mahino ai 'a e maama mo e ma'olunga 'o e maa'imoa ako pea fakalukufua mo 'ene 'afio'i 'a e lelei taha ma'ae kakai pea mo e fonua ni pea 'oku ui leva ia ko e TAKI MO'ONI.
    Ka tau ka lau ha lea a Akilisi ha fa'ahinga fakataha'anga, tapu moia, ka 'oku tau sio ki he pukupuku pea fosi'i 'a e fakakaukau pea fakamotu faka'ofa.
    'Alu leva 'etau sio ki he patiseti he taimi na'e fakakikihi'i ai e Akilisi ke to'o 'a e totongi ako ia 'a e kau Fale 'Alo. 'OKU HA LEVA E 'AHO NI? KUO 'AONGA TOTONGI AKO HE MAAMA MO E POTO 'OKU 'I HE TAMA TU'I TUPOU VI 'O HA NGALIPOTO AI KOTOA KITAUTOLU MEI TONGA NI.
    Pea 'oku tonu leva ke liliu etau LAO FILI FALE ALEA ke kanititeiti pe ha kau ako ke oo ki Fale Alea o tataki e fonua aki ha maama mo ha poto he kuo tau paahia he ololalo he lahi e vale.

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top