Fakataha ‘a e ‘Omipatimení mo e kau ‘ōfisa fetu’utaki mei he ngaahi potungāue mo e ngaahi kautaha ‘o e Pule’angá ^Featured

Na’e fakataumu’a ‘a e fakataha ko ‘ení, ke fakama’ala’ala ‘a e ngaahi taumu’a mo e founga ngāue ‘a e ‘Ofisi ‘Omipatimení, pea mo ha founga ke fengāue’aki vāofi ai mo e kau ‘ōfisa fetu’utaki mei he ngaahi kautaha mo e potungaue ‘a e pule’angá.

Tupu mei he lahi ‘o e ngaahi palopalema ‘oku ne fakafe’atungia’i ‘a e ngāue ‘a e ‘ōfisí ‘i hano fakatotolo’i ha lāunga, na’e fakahā ai ‘e he ‘Omipatimeni ‘o Tongá ‘Aisea Taumoepeau ko e taha ‘eni ha ngaahi fakataha’anga ‘oku kamata ke ngāue ki ai ‘a e ‘Ōfisi ‘o e ‘Omipatimení ke fehokotaki ‘a e fetu’utaki ki he ngaahi potungāué mo e kautaha ‘a e pule’angá ‘o fakafou ‘i he Pule Ngāué (CEO) pea mei ai ki he kau ‘ōfisa fetu’utakí pea ‘e malava lelei ai ‘a e ngāué.

“Ko e palopalema ia na’a mau fetaulaki mo iá, talamai he laó ko e foungá, kuopau ke mau fetu’utaki ki he CEO ‘o e Potungāué, pea mau fai leva ‘a e fetu’utaki ko iá. ‘Oatu ko iá note atu ‘a e CEO ‘a e fo’i ngāue ki he ‘ōfisá kene fakahoko, ‘oatu ia ko iá ‘oku teu ‘a’ahi ia ki muli pe ki Tokelau pea mo’u tukua ai pe ia ‘osi mai mo e ngaahi ‘aho kuo ngalo ia.”

“Ka ko e contact person (‘ōfisa fetu’utaki) ‘i he potungāué taimi ‘oku ‘oatu ai ‘a e ngaahi fetu’utakí ‘oku ‘i ai pē taha pau ‘oku ne fai e ngāue ko iá, pea ne tokanga’i koe’uhí kae lava ke hokohoko lelei ‘a e ngāue ‘oku faí.”

Na’e fakama’ala’ala foki ‘e he ‘Omipatimení ‘a e tefito’i ngaue ‘a e ‘ōfisí ‘o kau ai ‘a e feinga ke fakamatala’i ke mahino ‘a e pule leleí.

“Ko ‘etau fanongo pē ki he fo’i lea ‘omipatimeni, ‘oku ne ‘omai ‘e ia ‘a e fakakaukau ‘o e pule leleí. Ko e ‘etau a’u ki aí ‘e faingofua ange ai ‘etau ngāué. Ko e fatongia ia ‘o e ‘Ōfisi ‘Omipatimení ko hono feinga’i ke ‘ohake ‘a e pule leleí, ‘ikai ke ngata pē hono ‘ohaké ka ko hono pātoloaki ‘a e ngaue leleí.”