Logo
Print this page

Folau faka-faito’o ‘a e Palēmia ki Nu’usila Featured

Folau faka-faito’o ‘a e Palēmia ki Nu’usila

8 Fepueli, 2018. ‘Oku lolotonga ‘i Nu’usila ‘a e Palēmia ‘o Tonga ‘Akilisi Pohiva ko ‘ene folau fakafaito’o.

Kuo tuku mai foki ‘e he ongoongo ‘a e Kaniva 'i he 'aho ni ‘oku lolotonga  ‘i Nu’usila ‘a e Palēmia ko’ene livi pea fakahoko ai pe hono sivi faka-faito’o.

‘Oku ‘i ai foki mo e tali ia mei he kau poupou ‘o e Palēmia 'i he mitia fa-sosiale koe folau ‘a e Palēmia ko ‘ene kau atu ki he fakamanatu ‘e Nu’usila ‘a e Talite Waitangi neongo ‘oku ‘ikai ke fakapapau’i ‘eni.

‘I he taimi tatau ‘oku fakalongolongo ‘a e ‘Ofisi ia ‘o e Palēmia ‘o ‘ikai tuku mai ha ongoongo ki he kakai ‘o e fonua ka koe kau pupou pe 'eni ia 'oku nau tali fehu'i 'i he mitia faka-sosiale..

‘Oku fo’ou ‘a e hoko ‘a e founga ko’eni ‘i he Pule’anga ‘o e kakai he ‘oku ‘ikai ‘ilo ‘a e kakai ia ki he feitu’u ‘oku ‘i ai honau taki.

‘Oku mahino pe foki koe folau ia ko’eni ko e folau faka-faito’o pea ‘oku fua pe ‘a e fakamole kotoa ‘e he kakai totongi tukuhau neongo ‘oku ‘ikai ‘omai ha fakamatala kiate kinautolu.

‘Oku malie he ‘oku ‘asi mai ‘a e ‘ata ia ‘o e Palēmia mo e tokotaha Tonga ‘i he taha ‘o e ngaahi falekoloa Pack n’ Save ‘i ‘Aokalani.

'Oku 'i ai 'a e faka'amu 'a e ngaahi mitia ki he 'Ofisi 'o e Palēmia kenau tuku faka-'ofisIale mai 'a e ngaahi ongoongo fekau'aki mo e Palēmia 'o e fonua hange koia na'e hoko 'i he ngaahi Pule'anga ki mu'a pea koe founga ngaue faka-temokalati foki 'eni.

Nepituno Media Online © 2015. All rights reserved.