Laumalie lelei pe Eiki Palēmia: 'Ofisi Palēmia Featured
22 ‘o Sanuali, 2018. ‘Oku laumalie lelei pē ‘a e ‘Eiki Palēmia, Hon. Samuela ‘Akilisi Pohiva, hili ‘ene tengetange ‘i he ngaahi uike si’i kuo maliu atu, ‘a ia na’a ne ‘i he loki tokanga’i makehe pe ICU (Intensive Care Unit) ‘a e Falemahaki Vaiola, ke fai ‘a hono siofi mo tokanga’i ai.
‘Oku fie fakahoko atu mei he ‘Eiki Minisita Mo’ui ki he kakai ‘o e fonua ‘oku ‘i he tu’unga mo’uilelei pe ‘a e ‘Eiki Palēmia, pea na’e faka’ata ia mei falemahaki ‘i he faka’osinga ‘o e uike kuo ‘osi.
‘Oku mahu’inga ki he kakai ‘o e fonua ke nau fakatokanga’i ange ‘a e ngaahi fakamatala ta’emo’oni kuo tukuatu mei he ngaahi kautaha ongoongó, ‘o pehe ‘oku mo’ua ‘a e ‘Eiki Palemia ‘i he mahaki kanisaa.
‘Oku fie fakaa’u atu ‘a e fakamalō mei he ‘Eiki Palēmia mo hono famili ‘a e fakamalō lotohounga mo’oni, kia kimoutolu kotoa na’a mou ‘a ‘ahi mo lotu ange ia lolotonga ‘a e taimi na’e faingata‘a‘ia ai.
-'Ofisi Palēmia
