Faka'ikai'i 'e 'Akilisi Pohiva na'e 'ikai kene tuli 'a e Tokoni Palemia mo e Minisita Pa'anga Featured
Palemia faka-taimi 'o Tonga 'Akilisi Pohiva
4 Sepitema, 2017. Kuo faka'ikai'i 'e he Palemia faka-taimi 'o Tonga Samuela 'Akilisi Pohiva 'a e ngaahi ongoongo 'o pehe na'a ne fekau 'a e Tokoni Palemia Siaosi Sovaleni mo e Minisita Pa'anga Tevita Lavemaau kena fakafisi.
'Oku lolotonga 'i 'Apia Ha'amoa foki 'a e Palemia faka-taimi 'o Tonga ke kau atu ki he fakataha a e kau taki 'o e Pasifiki (Pacific Leaders Forum).
Na'e lipooti foki 'e he ngaahi kautaha ongoongo 'o kau kiai 'a e Kaniva Tonga hange koia kuo lipooti 'e he ongoongo 'a e Letio Nu'usila na'e fekau 'e 'Akilisi Pohiva 'a e Tokoni Palemia mo e Minisita Pa'anga kena fakafisi.
Fakatatau ki he ongoongo 'a e Letio Nu'usila na'e fakahoko 'e 'Akilisi Pohiva ki he fakataha 'a e komiti si'i 'a e Kulupu 'a e kau taki 'o Polinisia (Polynesian Leaders Group) 'a ia na'a ne sea ai 'i he 'aho ni 4 Sepitema 2017 'oku 'ikai ha mo'oni 'e taha 'i he ongoongo 'a e Kaniva Tonga.
'Oku malie foki he na'e 'osi faka'eke'eke mai 'a e Palemia faka-taimi 'Akilisi Pohiva 'i he 'aho Tokonaki 2 'o Sepitema 'a ia koe Tokonaki uike ia kuo 'osi pea na'a ne fakamahino koe mo'oni 'a hono fakamalolo'i 'o e ongo Minisita ka ko'eni kuo ne faka'ikai'i 'i he fakataha 'i Ha'amoa 'o fakatatau ki he lipooti 'a e ongoongo 'a e Letio Nu'usila.
Kapau koe mo'oni 'eni pea 'oku 'i ai 'a e me'a 'oku totonu ke fakatonutonu leva 'i he vave taha.
