Fiema'u ke toe lelei ange fakahoko fatongia 'a e kau polisi Featured
31 Siulai, 2017. Kuo fakahā mei he ‘ulu ‘o e Va’a ‘a e Potungaue Polisi ki he Tu’unga Fakapolofesinale (Tonga Police's professional standards unit) ‘oku ‘i ai e hoha’a mo e ngāue ‘oku fakahoko ki he tu’unga ‘oku ‘i a ‘a e fakahoko fatongia ‘a e kau ‘ofisa polisi ‘i he Potungāue.
Ko e fakamatala ia ‘a e ‘Inisipekita Pule ko Meleane Taueli ‘a ia ‘oku ne tokanga’i ‘a e tafa’aki ko’eni.
Na’a ne toe fakapapau’i ‘a e toko 9 ko’eni mei he Potungāue ‘oku tuku fakataimi ki tu’a pea ‘oku lolotonga fakahoko ‘a e ngāue kiate kinautolu ‘o kau kiai mo e ngaahi fakatotolo ki he faihala mo e hia ‘e 16 pehe ki he faka’eke’eke fekau’aki mo ha ngaahi me’a faka’ulungaanga fekau’aki mo e kau polisi ‘e 38.
Na’a ne toe fakamahino ‘oku lolotonga fai e tokanga lahi ki he tu’unga faka-‘ulungaanga ‘o e kau ‘ofisa polisi.
Na’e ne toe fakamamafa’i ‘a e ngāue ‘oku fakahoko ‘e he’ene ‘iuniti ke tokoni’i ‘a e kau ‘ofisa polisi kenau fakahoko lelei honau fatongia pea ‘oku nau toe tokangaekina foki mo e ngaahi launga mei he kakai ‘o e fonua mo e fiema’u ke fakalelei ‘a e fakahoko fatongia ‘a e Potungāue.
‘Oku mahino foki mei he fakamatala ‘a Meleane koe ngaahi fakatotolo ‘oku fakahoko ‘oku lahi ka ‘oku makatu’unga pe ia mei he ngaahi launga mei he kakai ‘o e fonua ‘a ia ‘oku kau lelei pe ia ke fakalelei’i ‘enau fakahoko fatongia.
Na’a ne toe pehe koe toko 12 ‘i he ta’u ‘e 5 kuo hili kuo fakamalōlō’i mei he Potungāue pea koe toko 5 ai na’e halaia ‘i he Fakamaau’anga.
