Talaki Fakafonua mo Faka Pule’anga Pekia ‘a e Kuini Fehuhu Kuini Halaevalu Mata’aho Featured
Ta'ahine Kuini Fehuhu 'Ofeina 'o Tonga Kuini Halaevalu Mata’aho - "Mapaki e Fa kae kei 'Alaha"
21 Fepueli, 2017. Na’e talaki fakafonua mo fakapule’anga ke mea’i ‘e he Hou’eiki mo e kakai ‘o e fonua ‘i he Letiō Tonga ‘i he efiafi ‘o e ‘aho ni ‘a e pulonga kuo tō ‘i he loto fale ‘o Ha’a Moheofo mo e fonua ‘o pekia ai ‘a e Ta’ahine Kuini Fehuhu 'Ofeina 'o Tonga Kuini Halaevalu Mata’aho.
Na’e me’a foki ‘a e Tama Pilinisi Kalauni Tupou To’a ‘Ulukalala ‘o fakahoko ‘a e fatongia ko’eni pea mahino foki mei he’ene me’a ‘e fakahā’ele mai ‘a e me'afaka'eiki 'o e Ta’ahine Kuini Fehuhu mei Nu’usila ‘i he ‘aho Tūsite 28 ‘o Fepueli ‘a ia koe Tūsite ia ‘o e uike kaha’u.
Na’e toe fakamahino mei he me’a ‘a e Tama ‘e fakahoko ai pe ‘a e Takipō ‘i he po’uli hifo ai pe ‘o e ‘aho tatau pea fakahoko leva hono telio ki he Mala’ekula ‘i he ‘aho Pulelulu 1 ‘o Ma’asi 2017 ‘a ia koe Pulelulu uike kaha’u ai pe ia.
‘I he me’a ‘a e tama na’a ne fakahoko ai pe ki he fonua ‘e tapu ‘a e famili ‘i he po ‘e 10 ‘a ia koe fonua fakakatoa ai pe ia.
Na’e pekia foki ‘a e Ta’ahine Kuini Fehuhu ‘i ‘Aokalani Nu’usila ‘i he efiafi Sapate 19 ‘o Fepueli ‘o fakafuofua ki he taimi 10:15 efiafi ‘i hono ta’u 90.
2 comments
-
Kuo toki tala fakapule'anga e me'afaka'eiki ia ka kuo 'osi kaaimu'a mai e ki'i letio ia 'a Lina 'o tala. 'Ai mu'a Lina mo mou 'ilo kimoutolu mo homou ngata'anga kae tuku e 'ohonoa'ia moe fie ma'u talanoa. Mou taafataha pe moutolu ki hono 'aofi mo malu'i homou 'otua ko 'akili he ko ena kuo mou ma'u kotoa e ngaahi polokalama moe ngaahi fanongonongo 'ae pule'anga. Tola ki ai kae mole e 'efika moe palanisi.
-
Tu'a'ofa atu Kuini Fehuhu, fakatauange kihe Eiki Mafimafi kene ohifo ha nonga mo ha fiemalie kihe Fale o Tupou mo Houeiki i he taimi faingata'a ni.