Tali ‘e he Kapineti kau memipa Poate fo’ou ‘a e Takimamata Featured
Saia Moehau Sea Fo'ou Poate TTA
Nuku’alofa, 29 Siulai 2016. Kuo tali ‘e he Kapineti ‘i he ‘aho Pulelulu 27 ‘o Siulai a hono fokotu’u ‘a e toko 4 fo’ou kenau hoko koe kau memipa ‘o e Poate Takimamata ‘a Tonga (Tonga Tourism Authority Board).
Kuo fokotu’u foki ‘a Siosaia Moehau kene hoko ko e Sea 'o e Poate 'a e Kataha Takimamata 'a Tonga. 'I he taimi tatau na'e toe fokotu'u pea mo e kau Talekita fo’ou ko Ken Walker mei he Air New Zealand, Lavili Maka mei he Fiji Airways, Starfort ‘Aho mei he Rising Sun Tours and Travel, pea mo Tevita Palu mei he Palu Aviation ‘a ia koia tokotaha pe ‘a e memipa ‘oku kei toe mai mei he Poate motu’a.
Ko hono fokotu’u ko’eni ‘o e kau memipa Poate fo’ou ‘oku makatu’unga ia mei he tu’utu’uni ‘a e Minisita Takimamata Hon. Semisi Sika ke veteki ‘a e Poate na’e Sea ai ‘a Tomifa Paea ‘a ia na’e fili ‘e Lavulavu lolotonga ‘ene hoko ko e Minisita Takimamata.
Ko hono tali ko’eni ‘e he Kapineti ‘a hono fokotu’u atu ko’eni ‘a e kau memipa fo’ou ‘e he Minisita Takimamata Hon. Semisi Sika mo e Potungaue ‘oku mahino mai ai ‘enau tali mo poupou ki hono veteki ‘e Sika ‘a e Poate na’e Sea ai ‘a Paea.
‘I he taimi tatau ‘oku tuku atu foki ‘e he ngaahi mitia ‘a hono launga’i ‘e Tomifa Paea ‘a ia koe Sea Malolo ia ‘a e Poate TTA ‘a e Minisita Takimamata Hon. Semisi Sika ‘o tukuaki’i ‘oku ‘ikai fakalao ‘a ‘ene tu’utu’uni ke veteki ‘a e Poate motu’a.
