Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

‘Ikai fiema’u ‘a Tonga ke fakafalala ‘i he Tokoni mei Muli Featured

‘Ikai fiema’u ‘a Tonga ke fakafalala ‘i he Tokoni mei Muli

Na’e fakahoko hano faka’eke ‘eke ‘o e ‘Eiki Palemia ‘o Tonga ‘e he Makasini Ongongo ‘a e Forbes 'i he 'aho 21 Fepueli 2015 pea na’a ne me'a ai 'o fakaha ‘oku fiema’u ke ako ‘a e kakai Tonga kenau topono pe fiemalie pe he me’a ‘oku ma’u ‘ehe fonua ka e ‘ikai ke fakafalala ki he tokoni mai ‘a hotau kainga mei muli, ngaahi pa’anga tokoni ‘oku fakahoko ‘e he ngaahi pule’anga muli pehe ki he ngaahi kautaha tokoni fakavaha’a Pule’anga.

Na’e me’a foki ‘a e Palemia ‘o pehe ‘oku fe’unga pe ‘a e koloa mo e ivi faka’ikonomika ‘oku ma’u ‘i Tonga ni pea ‘oku fu’u fuoloa fau ‘a e fakafalala ‘a e fonua ‘i he tokoni ‘a ia ‘oku ne faka’ai’ai ‘a e mo’ui faka falala ka e ‘ikai kenau ngaue malohi.

‘Oku fo’ou foki ‘a e faka’amu ko’eni ‘a e ‘Eiki Palemia ‘o fakatatau ki he angamaheni kuo tuku’au mai ai  ‘a e fonua ‘i he meimei ta’u nai ‘e fitungofulu tupu ‘o kamata mei hono fakaava ‘o Tonga ni ke fetu’utaki mo Tu’apule’anga pehe ki he ola ‘o e hiki fonua ‘a hotau kakai ki he ngaahi fonua muli ‘o tautautefito ki ‘Amelika, Nu’usila, mo ‘Aositelelia pehe foki ki he ivi malohi ‘oku ‘ikai hao mei ai ha fonua 'i mamani ‘oku ‘iloa koe ta’au faka kolope (Globalization).

‘Oku kau foki ‘a Tonga ni ‘i he ngaahi fonua masiva mo langalanga hake (under developed) pe koe mamani hono tolu (third world) ‘a ia ‘oku fiema’u faka mamani lahi ke fai hano tokoni’i ‘i he ‘uhinga fakaetangata (humanitarian). Ko e tokoni hotau kakai Tonga ‘oku nofo muli ‘oku lau miliona pea na’e a’u ki ha tu’unga ‘i he ngaahi ta’u kuo maliu atu koe lahi taha ‘o e pa’anga ‘a fonua ‘oku vilo ‘i he ‘ikonomika koe ma’u mei he si’i tokoni hotau kainga ‘oku nau fakapaea he ngaahi fonua muli 'a ia na'e a'u 'o 300 miliona he ta'u pea ‘oku kei ivi lahi mo malohi ‘a e tokoni koia he ngaahi ‘aho neongo 'ene holo he ngaahi ta'u kuo maliu atu.

‘Oku ‘i ai foki moe ngaahi langa fakalakalaka ‘a e fonua ‘o tautau tefito ki he ngaahi ngaue lalahi (infrastructural development) kuo ‘ova atu he piliona koe fakapa’anga ‘e he ngaahi tokoni mei muli moe ngaahi tokoni kehe pe he mala’e ‘o e fefofonga’aki, ako, mo’ui, ngoue, komiuniti mo e ha fua ‘oku ‘ikai ke tau fa’a lava laua 'a e pa'anga tokoni kuo tokoni mai'aki kiai.

‘Oku mahu’inga ‘a e fokotu’u kuo me’a ‘aki ‘e he ‘Eiki Palemia ki hono faka’ai’ai hotau kakai kenau ngaue malohi ka ‘i he taimi tatau ‘oku mahu’inga ke siofi lelei ‘a e ngaahi ‘atakai ‘e malava ke hoko ai ‘a e faka’amu mahu’inga ko’eni ‘o fakatatau ki he mo’oni mo’oni (reality) ‘o e halafononga kuo foua ‘e he fonua ‘oku taku ko Tonga masiva. 'Oku 'ikai pe foki ko Tonga ni pe ka koe tokolahi taha 'o e ngaahi fonua langalanga hake 'i mamani 'oku nau fou he hala tatau.

Ko e pole ‘eni kuo tuku mai ‘e he ‘Eiki Palemia ki he fonua pea ‘oku tau lotua pe he ‘oku ‘a e ‘Eiki hono fakahoko. ‘Oku ‘amanaki foki atu ‘a e ongo faiongoongo mei he kautaha Makasini ‘a e Forbes he ‘aho ni hili ia ha’a na ‘i Tonga ni ha meimei uike 'e  ‘e taha ke tanaki ha ngaahi fakamatala fekau’aki mo e nga‘unu faka histolia ko’eni ‘a Tonga ki he Temokalati pehe ki he teuteu ‘o e Hilifaki Kalauni ‘o e Hau e fonua.

Ko e Forbes koe kautaha Makasini Pisinisi ‘iloa mei ‘Amelika pea ‘oku lau miliona ‘a e kakai ‘oku nau lau.

Leave a comment

Make sure you enter all the required information, indicated by an asterisk (*). HTML code is not allowed.

back to top