Fakanofo ’a Semisi Sika ke Minisitā ki he Ngaahi Ngaue Lalahi mo e Ngaue Takimamata Featured
Hon. Semisi Kioa Lafu Sika
Nuku'alofa, 'Epeleli 20, 2016. Kuo mokoi ‘a e finangalo ‘o ‘Ene ‘Afio Tupou VI ke fakanofo ‘a Hon. Semisi Kioa Lafu Sika, ki he lakanga Minisitā ‘o e Ngaahi Ngaue Lalahi mo e Ngaue Takimamata, ‘i hono fokotu’u atu mei he ‘Eiki Palēmia ‘o Tonga, Hon Samuela ‘Akilisi Pohiva.
Ko e fokotu’u ko eni ki he lakanga Minisitaa, ‘e kamata lau ia mei he ‘aho 18 ‘Epeleli, 2016.
Ko Semisi Kioa Lafu Sika, ta’u 48 ‘o Haveluloto, ko e fakafofonga Falealea ia ki Tongatapu Fika 2 talu mei he 2010 pea ko e sea ia ‘o e Komiti Kakato ‘a e Falealea ‘o Tonga he to’u Falealea 2015-2018.
Kuo ma’u ‘a hono mata’itohi Bachelor of Science ‘i he Pisinisi/Fefolau’aki (Business/Travel Management) mei he ‘Univesiti BYU ‘o Hauai’i. Na’a ne faiako he ‘apiako Liahona ‘o e Siasi ‘o Sisū Kalaisi ‘o e Kau Ma’oni’oni ‘o e Ngaahi ‘Aho Kimui ni mei he 1995-1997. Na’a ne fakalele ‘a e kautaha fakafofonga folau Five Star Travel mei he 1998-2010.
Ko e memipa ia ‘o e Paati Temokalati ‘Otu Motu Anga’ofa pea ko e tangata pisinisi. Ko e taha ia e kau Talekita ‘o e Fe’auhi Fakafonua Heilala Festival; memipa ‘o e Poate ‘o e Sosaieti Kolosi Kula ‘a Tonga; Palesiteni ‘o e Kautaha Kolisi Tutuku ‘a Liahona; Palesiteni ‘o e Kautaha Pasiketipolo Faka-‘Amelika ‘a Tonga; Palesiteni ‘o e Kautaha ‘Akapulu Liiki ‘a Tonga mo e Sea ‘o e Kosilio Sipoti ‘a Haveluloto.
4 comments
-
'E lava fefe ke ne fakalele lelei ha potungaue 'a e Pule'anga kapau na'e 'ikai ke ne lava 'o fakalele 'ene pisinisi Kai Mai? pea koe Five Star 'oku 'ikai kau ia le lau 'oe pisinisi lelei. Pea koe ngaahi katoanga Uike Heilala na'a ne fakalele na'e kau ia he ngaahi polokalama ta'emaau, ta'epa'anga moe matu'aki ta'ekalasi 'o fakatatau ki he ngaahi festival tatau 'i Ha'amoa mo Fisi.
Pea kou fanongo na'e 'iai foki moe ngaahi me'a na'e hoko 'ihe kautaha Kolisi Tutuku 'a Liahona lolotonga 'ene palesiteni. Toe lahi moe ngaahi talanoa faikehe fekau'aki mo 'ene catering services ki he me'atokoni 'ae 'Apiako Liahona.
Ka koe me'a pau pe foki ia 'ae pule'anga ko eni ko hono fili noa'ia e kau minisita. Manatu kita ki he fa'a fili fa'ahi he taimi tau pekenene 'ae kau leka.
Poupou atu kia Mokfisi. -
MĀLŌ E FAKA-ONGOONGO LELEI 'O E MINISTĀ FO'OÚ...Lolotonga 'a e ngaahi poupou koe'uhi ko e hisitōlia ako mo e ngāue lelei, na'a tau toki sītu'a atu eni mei a 'Etuate Lavulavu mo e pupuitu'a tatau. Ka kuo tuku ki tu'a Pule'anga 'a Lavulavu ko e maumau lao.
1) Na'e ako mo Lavulavu 'i he BYU-Hawai'i, pea kuo tu'uaki mai 'e ne Siasi Māmonga.
2) Na'e lahi 'a e ngaahi ngāue lelei ma'a e kakai mo e fonuá.
3) Lolotonga ia, na'e 'i ai mo e ngaahi ongoongo kovi, ka kuo tanumia pe kinautolu 'i he 'etau kikihi ke lele 'etau hoosi 'o fika 'uluaki.
4) Tokanga na'a 'oku faka-pūlou'i kitautolu 'e he ngaahi ongoongolelei, koe'uhi ko 'etau kau ki he Siasi tatau. Hili ko ia, 'oku 'ikai ketau faka'eke'eke 'a e ngaahi palopalema na'a nau kau ki ai 'i he kuo hili. -
Talamonu atu kia Sika mo e fatogia fo'ou kuo hili ki uma. 'Ofa atu
-
Fakamonu atu Semisi Sika i he fatongia mamafa kuo fuesia atu. Fakatauange kihe Eiki kene tataki koe i he hala totonu, pea ke fai kihe finangalo oe Otua ikai koe Tu'i Faakakai. Fakamonu atu ki he hoa moe fanau he poupou. Mau Ofa atu mei Haapai Veu.