“ Kuo ke a'usia 'a e tu'unga mo e lakanga na ke feinga lahi kiai, pea na'e 'ikai ko ha feinga faingofua 'Eiki Palemia. Ta'u lahi 'eku 'i ho tu'a peau fiefia ma'u pe 'i ho'o ofongi 'a e ngaahi ngaue hala 'a e tafa'aki 'e taha, he na'e hoko ia ko ha me'a ke toe fakatonutonu 'aki 'enau ngaue. 'I he taimi 'oku lelei ai ho loto, ko e lea lelei 'aupito 'oku ke ngaue'aki pea 'oku malohi ma'u pe kiate au keu lau mo fanongo kiate koe he taimi 'oku ke lea lelei ai. 'I he taimi 'oku ke toutou tu'u ai 'i he Fakamaau'anga, 'ofa makehe na'a ku ma'u kiate koe mo ho famili peau faka'amua na'e lahi ha seniti keu tokoni atu. Na'a ku nofo leva 'o fifili kapau 'oku ke tau'i 'a e mo'oni koeha 'oku ke toe mo'ua ai? Fai atu e fononga a'u mai ki he taimi ni, 'oku 'i ai 'a e mahino makehe 'iate au 'o fekau'aki pea mo koe 'Eiki Palemia.
1. 'Oku ou fakatokanga'i na'a ke fu'u fakahoko 'a e ngaahi fakakaukau 'a e kakai muli 'o fekau'aki pea mo e Temokalati, ka ko e ngaahi fakakaukau koia 'oku fe'unga pe ia pea mo muli.
2. Na'e tokolahi ho kau poupou 'i Tonga ni pea ko e kakai lelei pea mo mahino 'enau ako mo 'enau ngaue, ka na'e 'ikai ke loloa ho'o mou feohi kuo nau mavahe, ka ke 'asi tokotaha pe koe.
3. 'I he taimi ni, 'oku te'eki ke mavahe pe hiki ho'o fakakaukau mei he pukupuku 'o e mo'ui na'a ke ma'u mo e anga ho'o to'o fatongia ke mahino kiate koe kuo ke Palemia. 'Oku ke kei mo'umo'ua holo pe he fanga ki'i me'a iiki, he fai fakamaau pea mo e hu'uhu'u, loto 'oku 'ikai ke lelei pea mo e tu'utu'unia 'a e me'a kotoa ke fai pe ki ho'o fiema'u.
4. 'Oku ke anga koe ki he toutou mo'ua 'i falehopo 'o fua pe ia 'e koe mo ho kau poupou mo ho famili ho fakamole koia, kuo ke tukuange pe 'e koe ke a'u ki falehopo 'a e me'a kotoa pea ngalo 'ia koe ko e kakai ia tenau totongi 'a e fakamole koia.
5. 'Oku kei lahi ho loto ka kuo holo ho sino mo ho'o fakakaukau (tapu mo koe), kuo ma'u e fakaha 'oku ke puke, 'oku ke pehee ko ho'o ngaahi faitu'utu'uni he'ikai uesia 'i ho'o puke?
'Oku ou faka'amua ha taimi vave mai, 'e lava ke malama atu ha maama kiate koe 'Eiki Palemia, tukuange 'a e ngaue ia, 'ofa koe ho'o mo'ui, tukuange mo e fonua, he 'oku sai pe fonua ia, ko ho'o piki kovi 'au koena o tu'utu'uni kovi 'e uesia kovi ai e fonua. Tukuange atu mo ho kau poupou kenau 'alu ki he lotu ke hanga 'e he laumalie 'o fulihi 'enau sio ke hangatonu kia Kalaisi ka e tuku aa e 'afungi.
Pea ki he kau poupou, tuku aa ho'o mou teke 'a 'Akilisi ke fai ee mo ee he 'oku si'i mahamahaki, mou tukuange Tangata'eiki ke ne enjoy mo Neo hona taimi 'oku toe 'i mamani. Pea kapau teke tukuange 'a Lavulavu teke toe mo'ui lelei ange koe 'Eiki Palemia.
Fakatauange ke mou ma'u ha kilisimasi fiefia mo ha ta'ufo'ou monu'ia. 'Ofa atu kiate koe 'Eiki Palemia. ”