“ Mālō 'aupito 'Ãteni Senile 'a e tokoni fake-laó...Ko e pangó 'oku 'ikai ko e kau loea kimautolu; ko e si'i kāinga keinanga'anga pē 'o e fonuá 'a si'emau ngaahi mātu'á mo e ngaahi kuí. Ka 'i he kuonga temokalatí ni, 'oku mau 'ilo 'emau totonu leá, mo e tau'atāina fakahā lotó 'oku malu'i 'i he Konisitūtoné.
1. Ko e Va'a 'e 3 'o e Pule'angá kuo tu'utu'uni 'i he Konisitūtoné kemou tu'u tau'atāina: (a) Va'a-Tauhilaó (judicial branch); (b) Va'a Fa'u Laó (legislative branch); (c) Va'a Fakahoko-laó (executive branch).
2. 'Oku mou tu'u tau'atāiná ke malu'i 'emau ngaahi totonu 'i he Konisitūtoné. 'Oku 'ikai totonu kemou ngāue fakataha (collude) ke ta'ota'ofi 'emau ngaahi totonú.
3. Ko e pule'anga faka-mālohi ia (tyranny) 'i hono tāmoloki 'emau ngaahi totonú.
4. 'Ikai totonu kemou alealea fakataha 'o felotoi (collusion) pea toki 'ohake ke fa'ufa'u ha ngaahi laó 'i Fale Aleá. 'Ikai totonu ke alealea 'a e Kapinetí (executive branch) mo e Va'a Tauhilaó (judicial branch), pea toki 'omai ki he Fale Aleá (legislative branch) ke paasi ko e lao fakavavevavé.
'Oku mau hu'uhu'u 'i hono fakavave'i 'a hono paasi 'o e Lao Fakaangaangá 'o e Ngaluopé 'e Hon. Siaosi Sovalení mei he Va'a Faka-hokolaó (executive branch). Pea taimi si'i pē, kuo poupou mai ki ai 'a e Va'a Tauhilaó (judicial branch).
Ko e "checks and balances" (faka-papau'i e palanisi) 'o e ngaahi Va'a 'e 3 'o e Pule'angá, 'oku totonu ke toki a'u ki hono hopo'i faka-tonutonu ki he Fakamaau'anga Lahí. ”