Fokotu’u ‘a Claude Tupou ki he lakanga CEO Potungāue Ako ^Featured

Ko hono fakapapau’i ko’eni hono fokotu’u ‘o Tupou hili ia hano tali ‘e he Va’a Lāunga ‘a e Va’a Ki he Kau Ngāue Faka Pule’anga (PSC Tribunal) ‘a e lāunga ‘a Tupou fekau’aki mo e ‘ikai ke fokotu’u ia ki he lakanga hili ha’ane tohi talangāue ki ai ‘i he kongaloto ‘o e ta’u 2015. 

Na’e ma’u foki ‘e Tupou ‘a e ‘initaviu ki he lakanga ko’eni 'o fakatatau ki polosesi anga maheni ka na’e ‘ikai fokotu’u ia ki he lakanga ko’eni ‘i he 2015. ‘Oku mahino pe foki ‘i he taimi tatau na’e ‘ikai ke poupou ‘a e Minisitā Ako he taimi koia ke fokotu’u ‘a Tupou pea na’e makatu’unga mai ai ‘a hono fakahoko ‘e Tupou ‘a e lāunga ko’eni ‘o fakatatau ki he’ene totonu ‘oku ‘oange ‘e he Lao ki he Kau Ngāue Faka-Pule’anga.

Na’e le’ole’o mai foki ‘a Tupou ‘i he lakanga CEO he taimi lahi hili ia ‘a e malōlō ‘a e CEO malōlō 'a e Potungāue ‘Emeli Pouvalu. ‘Oku ‘ikai foki ke puli ‘a e taukei ‘a Tupou ‘i he fakahoko fatongia ‘i he Potungāue Ako he koe ta’u lahi ‘ene fua fatongia ai ‘o a’u mai ki he’ene hoko koe CEO le’ole’o hili ‘a e ‘osi ‘a e fakahoko fatongia ‘a ‘Emeli Pouvalu. Na'e toe fakapapau'i foki mei he Sea 'o e Va'a ki he Kau Ngāue Faka-Pule'anga 'Uhila Liava'a 'a hono poupou'i 'o e fokotu'u ko'eni 'o Claude Tupou.

Fakatatau ki he ongoongo ‘a e Letiō Tonga ‘i he pongipongi ‘o e ‘aho ni, ‘oku te’eki mahino mai pe kuo tali ‘e Tupou ‘a hono poupou’i mo hono fokotu’u ia ki he lakanga ni. Na’e fakahoko mo e fetu’utaki ‘a e ongoongo ni kia Claude Tupou ka na’e ‘ikai ma’u ha faingamalie.