Tangane Fili ‘a e Tonga High School: Raw Mark (Maaka To’ofua) pe Standardized Score (Maaka Tulifua) ^Featured

‘Oku lahi e ‘u tefito’i me’a ‘oku fekaukau’aki ‘i he talanoa ki he raw mark mo e standardized score ‘oku fiema’u ke tomu’a mahino. Ko e kehekehe ‘o e tangata mei he manu (hangē ko e fakatapu), ko ‘e tau fa’u me’a (production) ‘o kau ki ai ‘e tau fa’u ako, koloa me’akai, faito’o, vala, fefononga’aki, fetu’utaki, langa, mo e ha fua, pea ko e konga lahi ko e ngaahi me’angāue (tools) ‘o kau ai e ongo me’afua koe ni ko e raw mark (maaka to’ofua) mo e standardization (Tulifua).

‘Oku tau tomu’a fokotu’u (specification) ma’u pe ‘a e fa’ahinga me’a ‘oku tau fiema’u ‘o kau ki ai mo e tu’unga hono kanolelei (quality), ‘osi pea tau ngaohi (production) pea ‘osi pea tau toki sivi (inspection) pe ‘oku ma’u e ‘u kanolelei na’e fokotu’u mai. Hangē ko eni, fiema’u e loli pickup toni ‘e 1 pea toe lava foki ke lele ki he oma ‘oku a’u ki he kilomita ‘e 140 ki he houa, ve’e 6, nofo’anga 2 pea kulo 8.

Ko e ‘u specifications ia, hoko leva ki hono ngaohi e pickup ‘e fiha afe pe mano he ngaahi falengāue pea toki fai leva hono sivi (inspection) pe ‘oku ma’u e ‘u specifications. Ko e fai sivi (inspection) ‘oku fou ‘i he founga fakasitetisitika pea ‘oku ‘iai mo e polokalama ako mavahe ki ai ‘oku ui ko e Statistical Quality Control pea ‘i he ngaahi fale ngaahi koloa ‘oku ‘i ai ‘e nau kau ngāue mavahe ki he sivi kanolelei (Quality Control).

Ko e ako ko e koloa ‘oku ngaohi pea ‘oku fou he sitepu e 3 neu lave ki ai. Ko e inspection ‘oku lava ke ngāue’aki e raw marks pe standardized score pea ko ia e kaveinga ‘e tau talanoa ko e fepaki ‘i he ongo me’afua ko eni.

Kuo u fanongo ki he ngaahi talanoa tokua kuo li’aki e standardization pea kuo toe foki pe ngaahi fonua ki he raw mark. ‘Oku ou fie tokoni atu ke fakamahino he’ikai lava ke li’aki e standardization ‘i he ako he ko e koloa (product) pea kuopau ia ke sivi’i pea ‘oku ‘ikai ha me’afua kene fakatataua e standardization, ‘o tatau ki ha fa’ahinga koloa pe ‘oku tau ngaohi. Ko ia ko ha toe mafuli kuo fai ‘e ha fonua ko e liliu pe ki he fa’ahinga standardization ‘e taha. Ka ‘oku ke tala’a pea ke email mai e system (This email address is being protected from spambots. You need JavaScript enabled to view it.) kau tuhu’i atu ‘a e nofo’anga ‘o e standardization ‘i he system koia.

‘Oku tefito e kehe ‘a e standardization mei he raw marks ‘i hono fakakau e ‘avalisi (mean) mo e feto’aki (variance) ‘o e ola ‘o e sivi ‘a e tamaiki ki he standardization ‘o ‘ikai tatau mo e fakakaukau ‘o e raw mark. Fakatokanga’iange ko e raw mark kapau ko e maaka haohaoa ko e 100 pea ka ke 50 ki ‘olunga ‘oku ke lava ka ‘o kapau ‘oku ke 49 ki lalo pea ‘oku ke to. Ko e ‘uhinga ‘o e faitu’utu’uni ‘a e 50 he ko e ‘avalisi (mean) ia, kapau teke tanaki e 0 + 1 + 2 + 3 +………+ 100 pea ke vahevahe’aki e 101 teke ma’u e 50, ko e ‘avalisi ia.

Ko e fakakaukau ko e toko 100 ‘oku sivi pea ko e toko 1 ‘oku fo’i 0, toko taha ‘oku fo’i 1, toko taha ‘oku fo’i 2, ‘o faai pehē ai pe ‘o a’u ki he toko taha ‘oku fo’i 98, toko taha ‘oku fo’i 99, pea toko taha ‘oku fo’i 100. ‘A ia ko e raw mark ‘oku fakatatau e lesoni kotoa pe pea tokua ‘oku anga tatau pe mo e anga ‘o e vahevahe ‘o e maaka.

‘Oku ‘ikai foki ke anga pehe ni e sivi ia, ko e sivi ‘oku ‘ikai fa’a a’u e maaka ia ki he 100 pea pehē ki he 0, pea ‘oku fa’a mahanga e tamaiki ia pe mahanga 3 ‘o ma’u e maaka tatau, pea fa’a ‘iai mo e ngaahi maaka kehe ‘oku ‘ikai ma’u ia ‘e ha taha, pea ko e ‘avalisi ‘oku malava ke 40 pe 50 pe 75, ka e ‘ikai hangē koe raw mark ‘o 50 ma’u pe.

‘A ia ko e natula totonu ‘o e sivi ‘a ee ‘oku faka’aonga’i ‘e he standardization, ko e ha pe maaka he sivi koia ‘oku fika’i mei ai e ‘avalisi mo e feto’aki, ‘a ia, koe’uhi ko e kehekehe ‘a e ngaahi lesoni ‘oku tau ‘amanaki leva ‘e kehekehe ho nau ‘avalisi mo e feto’aki.

(Teu toki hoko atu ki he Puipuitu’a ‘o e Standardization)