‘Ikai Ha Kapiteni (Dux) ‘a e Ako Ma’olunga Tonga ki he 2015 ^Featured

‘Oku makatu’unga ‘eni mei he liliu ‘a e founga ‘oku ‘a’ahi ‘aki ‘a e sivi ‘a e fanau ako mei he Standardization pea koe maaka faka’avalisi ki he raw marks pe koe maaka to’ofua. 'I he'ene pehe leva 'oku 'ikai malava heni ke faka'avalisi 'a e tu'unga 'oku 'i ai 'a e tamasi'i mo e ta'ahine ako 'o hange koe angamaheni.

‘I he fakamatala mei he Ako Ma’olunga ‘o Tonga na’e fakamahino me ai ‘oku ‘ikai malava ‘e he founga fo’ou ko’eni kuo nga’unu kiai ‘a e sisitemi ako ‘a e fonua ‘a ia kuo teke mo poupou’i ‘e he ‘Eiki Minisitā Ako ‘a ia ko e Palēmia ia ‘o e fonua Samiuela ‘Akilisi Pohiva.

‘Oku ‘i ai ‘a e hoha’a lahi heni mo loto mamahi ‘a e matu’a tauhi fanau, fanauako mo e kau kolisi tutuku ‘o e Ako’anga ni ki he nga’unu ko’eni pea 'oku fehu'ia leva pe koe hā ‘ene tu’u ki he kaha’u. ‘I he taimi tatau ko e kaveinga ‘eni na’e lahi hono tālanga’i he fonua ni pea ‘oku tupu ai mo e ngāngā’ehu ‘i he Potungāue Ako ka ‘oku pelulā kotoa ki he tu’utu’uni mei taumu’a mei he Minisitā Ako mo 'ene ngaahi fokotu'utu'u.

Ko e konga foki 'eni 'a e faito'o ki he holo 'a e ako 'i he fonua ni 'o fakatatau ki he savea na'e fakahoko 'e he mo tataki 'e he mataotao 'oku falala kiai 'a e  Minisitā Ako ko Paula Piveni Piukala.

Ko e liliu lahi ‘eni ki he tukutuku’au mai ‘a e ako ‘i he fonua ni pea ‘oku faka hisitōlia he koe toki fuofua taimi ‘eni ke ‘ikai ‘i ai ha taha ‘e Kapiteni ‘i he ‘apiako talaa ko’eni ‘o Tonga pea ‘oku taku koe ‘Apiako lelei taha ‘eni ‘i he fonua.