Foaki 'e he Pule'anga Siaina Sikolasipi 'e 28 ma'a Tonga Featured
Sekelitali 'Uluaki 'Ofisi 'Amipasitoa Siaina Jia Xiaopan, 'Eneasi Fanua Palanite mo Dr. Helu (Pule 'o e Tonga International Academy
12 'Aokosi, 2016. Kuo foaki ‘e he Pule’anga Siaina ‘i he efiafi Pulelulu 10 ‘o ‘Aokosi ‘a e ngaahi sikolasipi ‘e 28 ki he fanauako Tonga kenau ako ‘i he ngaahi ‘Univesiti ‘i Siaina.
Na’e foaki foki ‘e he ‘Amipasitoa Siaina HE Mr Huang Huaguang ‘a e sikolasipi ko’eni e 28 ki he fanauako Tonga ko’eni ‘i he Matatahi Kahana.
Na’e fakafofonga’i ‘e he ‘Eiki Palemia ka koe Minisita Ako ‘Akilisi Pohiva ‘a e fakamalo ‘a e Pule’anga mo e fonua. Na’e toe fakamamafa’i foki ai ‘e he Palemia ‘a e ‘ikai malava ‘e he Pule’anga moe fonua ke fakapa’anga ‘a e ako ‘a e fanau ki he levolo ma’olunga ange pea ‘oku hounga ‘a e tokoni ‘a Siaina.
‘I ha fakamatala ‘a e taha ‘o e kau ma’u Sikolasipi ‘Eneasi Fanua Palanite mei he Tonga International Academy na’a ne fakaha ai ‘ene hounga’ia he tokoni ko’eni ‘a Siaina ‘o malava ke a’usia ‘ene misi ke hoko atu ki ha levolo ma’olunga ange.
Ko Palanite foki na’a ne ako pe he Tonga International Academy ‘o ma’u ai hono BA pea ‘oku hoko atu ‘eni ki hono MSc he marine Science.
‘I he fakamatala ‘a e Amipasitoa Siaina HE Mr Huang Huaguang koe talu hono kamata ‘a e tokoni faka-Sikolasipi ‘a Siaina ki Tonga 1999 pea koe toko 179 ‘aki ‘eni ‘a e fanau Tonga kuo nau ma’u faingamalie ai.
Ko e tokolahi kuo nau foki mai mo e ngaahi tu’unga fakaako ma’olunga ‘o tokoni ki honau ngaahi famili mo e fonua.
