Hoha'a Lahi 'a e 'Eiki Palemia ki hono Sikeili 'a e Maaka 'o e Sivi Featured
Kuo tukupa 'a e 'Eiki Palemia 'o Tonga 'i hano faka'eke'eke 'e he Televisone Tonga 'i he po Sapate ko hono 22 'o Fepueli 'e fakahoko ha ngaue fakavavevave ke fakalelei 'a e hoha'a 'a e kakai 'o e fonua ki he founga 'oku maaka 'aki 'a e ngaahi sivi faka Pule'anga 'o tautautefito ki hono makaa 'a e sivi 'a e foomu 7.
"'Oku 'amanaki ke 'omai 'e he Potungaue Ako ha mataotao mei Tu'apule'anga kene vakai ki he me'a ni" koe me'a ia 'a e 'Eiki Palemia.
Na'e toe me'a foki 'a e 'Eiki Palemia koe ola 'o e sivi 'o e ta'u kuo 'osi na'e lava pe 'a e toko 9 me he toko 121 'i he lesoni 'Ikonomika pea hili hono sikeili na'e lava leva mei ai 'a e toko 66. 'Oku hoha'a lahi 'a e 'Eiki Palemia ki he kaveinga ni 'i hono fatongia ko e Minista ki he Potungaue Ako pea 'oku 'ikai foki ke sola ki he fatongia he na'a ne fakakaungatamaki 'i he Potungaue ako koe faiako kimu'a pea ne toki hoko atu ki he mala'e 'o e politikale.
Na'e toe fakaha foki 'e he 'Eiki Palemia koe fanauako 'oku nau ma'u 'a e maaka ma'olunga 'o hange koe A+ 'oku nau kei faingata'a'ia pe 'i he taimi 'oku nau hu ai ki he ngaahi ako'anga faka 'univesiti pea na'a ne fakatataa 'aki 'a e Ako'anga Fakafaito'o 'i Fisi (Fiji School of Medicine). 'Oku 'ikai ngata ai ka 'oku faungata'a ki he matu'a kenau fakafuofua'i lelei 'a e tu'unga fe'unga fakaako 'oku 'i ai 'enau fanau.
'Oku 'ikai foki ko'ene toki hoko 'eni 'a e palopalema ni 'i Tonga ni pea na'e ngaue'aki 'e Ha'amoa mo Fisi 'a e founga tatau ka 'oku na 'osi mavahe mei ai 'o fakatatau ki he fakamatala 'a e 'Eiki Palemia.
