Fehu’ia mei he ‘Univesiti Massey mei Nu’usila mo e USP Tu’unga Falala’anga Sivi Ngaahi Kolisi ^Featured

‘I he taimi tatau kuo ma’u mo e ngaahi fakamatala falala’anga ‘oku tailiili ‘a e tokolahi ko e ‘uhinga ko ‘enau ngāue pea ko e tokolahi ‘oku nau lele fakalongolongo pea mo e ngulungulu fei’umu.

Lolotonga ‘eni kuo ma’u ‘e he ongoongo ni ‘a e fakamatala falala’anga na’e toe fehu’ia foki mei he ‘Univesiti ‘o Massey mei Nu’usila ‘a e ola ‘o e sivi mo e tohi fakamo’oni ako ‘a e ni’ihi na’a nau kau atu ki he sivi 2015 ‘a ia ‘oku nau feinga hu ki he ‘Univesiti ni. Ko e ola foki ia ‘e ua na’e ‘ave ki he ‘Univesiti ni ‘a ia koe ola ‘e taha ki he tokotaha pea ‘oku kehekehe lōua. Na’e fehu’ia foki mei Massey pe koe fē ‘a e ola tenau ngāue’aki he ‘oku kehekehe ‘a e ola ‘o e sivi ‘oku ‘oange kiate kinautolu ‘a ia ‘oku ua pea ‘ikai mahino pe ko fē ‘e ngāue’aki.

Ko e me’a tatau na’e hoko ‘i he ‘Univesiti ‘o e Pasifiki Tonga pea ‘oku fehu’ia ai ‘a e tu’unga taau ‘o e founga fakamaaka ‘oku ‘unu kiai ‘a e fonua he na’e ‘ikai hoko ha me’a pehe ni ‘i he kuohili. ‘Oku longo foki ‘a e kau faiako ka ko e fehu’i heni pe ‘e kalusefai heni ‘a e kaha’u ‘o e ako ko e ‘uhinga ko ‘enau ilifia ki he’enau ma’u’anga mo’ui pe ko ‘enau fakahā ki he fonua ‘a e me’a totonu ‘oku hoko. ‘Oku mahino pe foki ‘eni ia ka na’e malava foki he kuo hili ke fakahā ‘a e le’o ‘o e kau faiako ‘i he hiki vāhenga ka ko’eni ‘oku ki’i fakalongolongo’i ‘etau samena pea ‘oku ‘ikai fu’u mahino ‘a e ‘uhinga he koe ako 'a e 'uhinga ia 'enau fakahoko fatongia.

Na’e fakahoko ‘a e fetu’utaki ‘a e ongoongo ni ki he ngaahi Ako’anga ‘a e Pule’anga ka e pehe ki he Potungāue Ako ka ‘oku mahino mai foki he taimi tatau ‘a e ngaahi tu’utu’uni ‘oku ‘oange kiate kinautolu fekau'aki mo ha talanoa ki he mītia. 'Oku fai 'a e faka'apa'apa lahi ki heni ka koe taha'i kaveinga 'eni 'oku 'i ai 'a e tui 'oku totonu ke tau'atāina hono tālanga'i 'uhinga 'i hono mahu'inga ki he fonua.

Kuo kamata ngāue foki mo e ngaahi kolisi tutuku ‘e ni’ihi ‘o kau ai ‘a e Ako Ma’olunga ‘o Tonga ke fakahoko ha ngāue ke haofaki’i ‘a e tu’unga ‘oku ‘i ai ‘a e ako ‘a e ‘apiako ni ‘o fakatatau ki he ngaahi fakamatala kuo ma’u ‘e he Kosilio ‘a e Kolisi Tutuku ‘a e Ako’anga ni mei he ngaahi lipooti kuo ma’u mei he kau faiako ‘a e Ako’anga ni. Ko e founga pe 'eni 'e taha 'a hono mamahi'i mei tu'a 'a e tu'unga fehu'ia 'oku 'i ai 'a e ako 'i he fonua ni fakatatau ki he lau 'a e taha 'o e kau kolisi tukutuku.

Kuo fuofuoloa mai 'a e tālanga 'a e ngaahi mitia fekau'aki mo e kaveinga ni pea koe fatongia totonu pe 'eni ia ke fakahoko he 'oku 'ikai toe 'ekea 'a e mahu'inga ia 'o e ako ki he fonua.