Ki ha Ta’u Fo’ou Fiefia mo Monū’ia ^Featured

Na’e lahi hono ngaahi pole pea ‘oku tau fakafeta’i ‘i he’etau a’u ki he hifonga ‘o e ta’u ‘oku kei tu’uma’u pe ‘o ‘ikai liliu ‘a hono fai tapuekina kitautolu ‘e he Tamai Hevani.

Na’e lahi e ngaahi peau tā ‘o tafia atu ai hotau ni’ihi pea ‘oku ‘i ai mo e ngaahi pole ne tau fehangahangai moia 'i he tafa'aki faka 'ikonomika, politikale mo sosiale ka neongo kotoa ia ‘oku tau tui koe ngaahi fokotu’utu’u pe na’e ‘ai ke pehē ‘o fakatatau ki he’etau tui faka-laumālie pea ko e anga ia ‘etau mo’ui he fononga’anga ‘oku pau pe ketau fepaki mo hono ngaahi ha’aha’a pea ko’etau ikuna ia koe koto fakakoloa lahi ‘i he mo’ui.

‘Oku ‘ikai puli pe unga ‘a e tō kehekehe ‘etau tui ‘o tatau pe he tapa kotoa ‘o e mo’ui he ‘oku takitaha ‘a e tangata mo ‘ene tui mo’ene fakakaukau pea ‘oku ‘ikai kauhala tatau he taimi kotoa. ‘Oku malava foki ke tau langa ‘i he’etau tō kehekehe ‘o tatau pe ‘i ha tapa ‘o e sosaieti tetau kau kiai pea koe natula totonu ia 'o e mo'ui ke tau a'usia hono ngahai lelei 'i he funga 'o e faingata'a moe fihitu'u 'a e mo'ui.

Ko e ta’u faingata’a foki ‘a e 2015 ‘o tatau pe moha toe ta’u ange he fononga’anga ka ‘oku tau lau tapuaki kotoa he ngaahi lelei kuo fakakoloa ‘aki ‘a ‘etau ngaahi mo’ui faka-fo’ituitui, faka-fāmili, faka-siasi, faka-kolo, faka-fonua mo e hā pe ha fa’ahinga kupu fekau’aki ‘oku tau kau kiai. 'E 'alu atu 'a ta'u 2015 'o nofo he'etau tukunga manatu ka na'a ne 'omi 'a e ngaahi to'ongapō ketau ako mei ai pea 'oku kaungatonu ki he fakalakalaka 'etau mo'ui.

‘Oku fiefia lahi ‘a e ki’i kautaha ongoongo ko’eni Nepituno Tonga Online News 'i he’etau kau fakataha mai he ta’u 2015 ‘a ia koe ta’u ‘uluaki ia ‘a e faifatongia ‘a e ki’i kautaha ni. ‘Oku ‘oatu ai pe mo e kole fakamolemole ki he kakai kotoa ‘oku nau faka’aonga’i ‘a e ki’i kautaha ni ki ha tō nounou ‘i he ta’u 2015 ‘a ia na’e ‘ikai hoa mo ho’omou fakakaukau pehe ki ho’omou ‘amanaki.

Ko e lelei taha pe ‘eni na’e fakahoko ‘e ho’omou ki’i kautaha ni ‘i he fatongia mafatukituki ko hono ‘oatu ‘a e ngaahi ongoongo mo e ngaahi fakakaukau ‘oku ‘i ai ‘a e ‘amanaki ‘oku tokoni atu ki he anga ‘etau nofo he sosaieti.

‘Oku ‘oatu fakataha ia mo e talamonū mo e ‘amanaki tetau ma’u ha ta’u fo’ou 2016 fonu tapuaki pea ke fakaola mei ‘olunga ‘a e ngaahi ‘amanaki moe ngaahi visone ‘oku fakatoka he’etau ngaahi fakakaukau.