Fakamanatu ‘o e Kilisimasi Featured
‘Oku tau fakaofi atu ‘eni ki hono fakamanatua ‘o e ‘aho ‘alo’i hotau Fakamo’ui ka koe Pilinisi ‘o e Melino Ko e ‘aho mahu’inga mo mafatukutuki ia ‘o e ta’u pea kuo laui senituli hono fakamanatua ‘o e ‘aho mahu’inga ni ‘e he kau Kalisitiane kotoa ‘i he Kolope.
‘Oku ‘ikai puli ‘a e mahu’inga ‘o e ‘aho ni ‘i he lotu faka-Kalisitiane he koe ‘aho ‘o e ‘amanaki lelei mo e ‘aho ‘o e fiefia ‘i he faha’i ta’u ‘Epifani ‘i hono fakahaa’i ‘a e ‘alo ‘o e ‘Otua ‘ia Sīsū Kalaisi. Kuo ‘amanaki ‘alo’i ‘a Sīsū ‘i Petelihema he kolo ‘o Tevita pea na’e alo’i fakamasivesiva he ‘ai’angakai ‘o e manu ke fakahā ki mamani ‘a e laumalie ‘o e fakatōkilalo.
‘Oku ngatū ‘a e Tonga kotoa ko e mateuteu ki he ‘aho lahi ni pea kuo a’ukau mai ‘a e ngaahi fāmili mo e kainga mei muli ki honau ngaahi kolo tupu’anga ke kaungā kau fakataha mo honau ngaahi fāmili mo e kainga ‘i hono fakamanatua ‘o e ‘aho mahu’inga ni. Ko e ‘aho ‘o e fakama’opo’opo pea kanongi’aki ‘a e fiefia mo e melino.
‘Oku ‘ikai fai ha lau ia ki he mo’ui ‘a e ngaahi pisinisi ‘i he fonua ‘i he longomo’ui ‘a e fefakatau’aki ‘o tatau pe mei he ngaahi falekoloa ki he ngaahi pisinisi nofo totongi he ‘oku ‘omai ‘ehe ‘aho tupu’a ni ‘a e fakatu’amelie ‘i he tapa kehekehe ‘o e mo’ui ki he fonua mo hono kakai.
Ko kinautolu ‘oku fakapaea ‘i he ngaahi fonua muli ‘oku ake ‘a e manatu ki he ngaahi kolo tupu’anga ‘o tautautefito ki he ngaahi uike kimu’a pea pehē foki ki he ‘aho Kilisimasi. Ko e ngaahi me’a lelei kotoa pe kuopau ke teuteu ki he ’aho ni kae tautautefito ki he fanau he koe ‘aho ‘oku nau ‘amanaki lelei mo faka’aamu ke fai mo’au kiai.
‘Oku ‘ikai ngata ‘i hono ouau faka laumālie ka ‘oku ‘i ai ‘a e ongo ‘oku ma’u ‘e he tangata kotoa ‘i he’enau takitaha a’usia ‘a e momofi ‘o e ‘aho ni ‘i hono ngaahi hiva mo hono ngaahi ongo fakalaumālie ‘a ia ‘oku ne ‘oange ‘a e nonga mo e tau’ataina mavahe ki he tangata ‘i he vaha’a taimi ‘oku teuteu ai mo fakahoko ai hono fakamanatua ‘o e ‘aho Kilisimasi.
‘Oku tuku kimui ‘a e me’a kotoa ka tau hanga tau ke talitali ‘a e Pilinisi ‘o e Melino ‘a ia ‘oku ne ‘omi ‘a e fakatu’amelie mo e ‘amanaki lelei kiate kitautolu pea ke tau tali ‘i he loto fiefia mo e ‘ofa. ‘Oku toe hanganaki mai ‘a e ta’u 2016 mo hono ngaahi naunau pea ‘e malava kotoa ia ‘i he kau mai ‘a e Pilinisi ‘o e Melino.
‘Oku ‘oatu ai pe heni moe talamonu mei he Nepituno Tonga Online News ki he kakai kotoa ‘oku mou manako ke kau fakataha moe ki’i Kautaha Ongoongo ko’eni. ‘Ofa ke mou ma’u ha Kilisimasi Fiefiea moha Ta’u fo’ou fonu Kelesi’ia.
'Ofa Atu
Nepituno Tonga Online News
