Kātoa 'a Tonga 'o Taha: Teu Kapapuna 'Ikale Tahi 'i Polata'ane ^Featured

‘Oku mahino foki na'e fu’u poupoua ‘a e Ipu ‘a Mamani 'o e ta'u 2011 ko hono fakahoko mai ki Nu’usila 'oku tokolahi ai hotau kainga pea ofi foki ki Tonga ni ka ‘oku ‘ikai ‘uhinga ‘eni ke tuku ai ‘etau poupou ki he'etau 'Ikale Tahi.

 Kaikehe ‘oku mahu’inga foki ‘i he fo’i taimi ofi atu ko’eni 'a e tu'u fakataha he ‘oku toe pe lau 'aho pea fakahoko 'a 'etau 'uluaki va'inga he 'aho 19 Sepitema 'a ia ko e Tokonaki uike kaha'u ia pea 'oku 'ikai ke tau kei tatali ke fai mo a'u ki he 'aho koia kae kapapuna 'a e 'Ikale Tahi 'i Polata'ane. 'Oku 'ikai toe veiveiua 'a e 'amanaki lelei 'a e tokolahi ki he 'Ikale Tahi pea na'e ola lelei mo e ngaahi feinga va'inga kimu'a 'i he teuteu atu ko'eni ki he taimi kuo kotofa 'o hangē koia ne talaki mei mu'a.

‘Oku ‘ikai puli ‘a e malava ‘e he faiva ni ke fakatahataha’i ‘a e kakai ‘o e fonua mei he tapa kotoa ‘o e mo’ui ‘o hangē koia na’a tau sio mata ai ‘i he ta’u 2011. ‘Oku ‘ikai koha taimi ‘eni ke toe fai ai ha fetuhuaki ka ketau tu’u ‘o poupou ki he teuteu ‘oku fakahoko mo e ‘amanaki ‘e toe fakahoko ‘e he ‘Ikale Tahi ha me’a fakafiefia ‘o hangē koia na’a tau a’usia ‘i he ta’u 2007 mo e 2011.

‘Oku ‘i ai hotau faingamalie ke tau fakahoko ha toe fakatuputupulangi 'o hangē koia na'e hoko he'etau fakapa'ulu 'a e fu'u moata'ane 'a Falanisē 'i he 2011. 'Oku 'ikai 'uhinga 'eni ia ketau ta'etoka'i 'a e ongo timi 'oku tau 'i mu'a 'iate kinaua he fakahokohoko 'a e Poate 'Akapulu 'a Mamani 'o hangē ko Georgia mo Namibia ka 'oku fiema'u ke fakapapau'i 'e he'etau 'Ikale 'a e ua ni kimu'a pea tau sio atu ki hano tukuhifo 'o 'Asenitina pehe ki he Hau 'o mamani he faiva ni 'a e 'Olopeleki.

Hangē koe fakahua 'a e kau mama kava Tonga ko e anga pe 'eni ia 'o e "usuusu" ka 'oku 'ikai mama'o mei ai 'a e faka'amu. 'Oku fiema'u he taimi tatau ketau lotu hufia 'etau fanau va'inga mo e feinga 'oku fakahoko he koe taimi 'eni kuo katoa 'a Tonga 'o taha.

Talamonū atu ki he ki he Timi ‘Ikale Tahi pehē ki he kau 'ofisiale mo e kātoa 'o e kau folau. Fakatauange ke ola lelei 'a e feinga 'i he laumalie 'o e fiefia pea ke 'ave ai pe 'a e fonua ki he tumutumu.