‘Oku tapu ‘a e Siolalo ki Ha’apai Veu ^Featured

‘I hono fakalea ‘e taha ‘oku tapu ‘a e sio lalo ia ki he Fo’i ‘One’one he kuo he’aki ‘e Molitoni he tohi himi ‘a e SUTT “he fo’i ‘one’one na ‘aonga ki he ha? ka pa peau mei he moana ‘ikai ta’ofi he maka na koe ‘one’one ‘e lava”.

Na'e ha’aki fakataha atu ‘a e ngaahi katoanga lalahi ko’eni ‘o kau kiai ‘ e katoanga Ha’apai Masani, Konifelenisi hono 95 ‘a e SUTT, Faka’ali’ali Ngoue, Katoanga’i ‘aho ‘alo’i ‘o e Tama Tu’i ‘o ‘ikai lau kiai ‘a e ngaahi katoanga faka-famili mo faka-Ha’a pehe ki he ngaahi katoanga kehekehe pe ‘oku taumu’a ki he fiefia mo e langafonua.

Ko e lava nai ‘eni ha uike ‘e ua nai ‘a e lauta ‘a e kakai tokolahi mo’oni mei he tapa kehekehe ‘o Tonga ni mo muli ‘i he Fanga ‘i he Si pea ‘oku fakamahino lelei ‘e Ha’apai ‘oku nau malava pe ke fakalato mo fakakakato ‘a e ngaahi fiema’u fekau’aki mo e ngaahi katoanga ko’eni mei he me’atokoni ki he nofo’anga ‘o ‘ikai fai ha lau ia ki he ngaahi fiema’u anga maheni mo ha fa’ahinga fiema’u pe ‘a ia ‘oku toe ma’u pe moia ‘i he Pako.

Na’e fai foki hono toutou fehu’ia ‘a e tu’unga ‘oku ‘i ai ‘a Ha’apai hili si’enau fakaakeake mei he Saikolone Fakatalopiki ko Ian pea na’e talanga’i lahi ‘i he Konifelenisi hono 94 ‘a e SUTT pe ‘e malava ‘e Ha’apai kene housi (host) pe fakahoko ange kiai ‘a e Konifelenisi hono 95 ‘a e SUTT.

Ko e kaveinga tatau pe ia na’e toe fai pe mo hono siofi ‘i he teuteu atu ki he ngaahi katoanga kehe ‘a ia ‘oku nau lele fakataha ki he ‘Otu Ha’apai ‘a ia ‘oku kei tu’ulahoko pe ‘o a’u mai ki he ‘aho ni.

Ko e ngaahi tala’a kotoa mo e talafili koia kuo ma’u hono mo’oni ‘i he Fanga ‘i Lifuka he kuo fakafehalaaki’i ‘e Ha’apai Veu ‘a e ma'u 'a e Tonga kotoa pea kuo faka-hisitolia ‘a e ‘otu katonga kotoa ko’eni pea lava lelei mo faka’ofo’ofa tukukehe ange hono masani mo hono mohu pea fielau he hako ‘o e kakai to’a mo e hulihuli ‘o e toa kuo tahi.

Ko e ngaahi talitali ‘i he tepile ‘o e lotu ‘oku mahino ‘a e folaloa ‘e he kakai honau ivi ‘i he’enau ‘ofa he lotu pea ‘ikai fai ha lau ki hono fakahaha honau ivi mo ‘enau ngaue ‘i he faka’ali’ali ngoue pe he ki he a’u mai ki hono kamata katoanga’i ‘o e ‘aho fakahifo ‘o e Tama Tu’i ‘oku ‘ikai ha holo pea kuo tau e lahi ‘i he Fanga Falikipako.

‘Oku kei talanoa’i ‘i he ‘Otu Tonga pea tuku mai ‘e he ngaahi kautaha ongoongo pehe ki he mitia faka-sosiale ‘a e masani mo e fiefia ‘o e ngaahi katoanga ‘oku lolotonga fakahoko ‘i Lifuka ‘o vakavakaoo ai ‘a e Pule’anga mo e Siasi pea malohi ai ‘e Fonua ‘a ia koe kakai ia mo hono tukufakaholo.

'Oku toe mahulu foki mo e laupisi 'eiki 'a e kainga Ha'apai mo 'enau laukau 'aki 'a e Tu'i Haapai kae fefe he ko honau kakala tauleva ki he pa'anangalu 'o taimi.

Ko e ‘ata totonu ia ‘o e Tonga ‘o fakatatau mo e fa’unga ‘o e fonua ‘a ia ‘oku tau kei laukau ai ‘o a’u ki he ngaahi aho ni.

‘Oku tau kaunga fiefia ai pe he folanima ‘a e ‘Otu Ha’apai ‘o mahino ai ‘oku kei Tonga pe ‘a Tonga.