Menu
cache/resized/08c0a7e4df7cc3828bd4ac05d0fd2f03.jpg
Paloveape 'o e Uike Matavaka Pikivaka ...
cache/resized/42eeee36d7906494f572f8383fc5e456.jpg
‘Aho 6 Sepitema, 2017 Palesiteni / Kau ...
cache/resized/63614fa437cb694b8770470f544a87ea.jpg
“TOURS & TRAVEL AT IT’S BEST IS ...
cache/resized/de22811ba69e150b74276adfe9cd60f1.jpg
S&F Brothers (Car Dealer & Accounting ...
cache/resized/c5486089fb6fe141100fa93741aee80f.jpg
Vaiola Shop & Cafe  
cache/resized/952d37c5b239f200e4b0a944bfa8cde0.jpg
RED Rapid Engineering Diagnostic Specialize in: ...
cache/resized/4aa5e843d919f2a85363b065c748eef3.jpg
TONGA INTERNATIONAL ACADEMY ACADEMIC ...
Latest News

Mahino 'a e mahu’inga ‘o e fatongia fakaanga mo e mītia Featured

Mahino 'a e mahu’inga ‘o e fatongia fakaanga mo e mītia

Lau 'a e 'Etita

Mahino 'a e mahu’inga ‘o e fatongia fakaaanga mo e mītia

Kuo hoko ‘a e ngaahi me’a kuo tau fetaulaki mo ia ‘i he lolotonga ni ‘i Tonga ni ‘o tatautefito ‘i he tafa’aki faka-politikale kene fakamo’oni’i ‘a e mahu’inga ‘o e fakaanga mo e mītia ki he fonua.

Ko e fatongia ‘o e tafa’aki fakaanga ‘i ha fa’unga faka-Temokalati ko hono tuhu’i atu ‘a e fehalaaki ‘i he fua fatongia ‘a e Pule’anga mo e kau ma’u mafai pea mo hono fiema’u ke fakatonutonu leva.

‘Oku ui ‘i he lea faka-Pilitānia koe opposition pea ‘oku ‘uhinga ia ko e tafa’aki kenau hoko ko e kulii le’o (watchdog) pea kenau lea fekau’aki mo e hala ‘oha fua fatongia ‘o taumu’a ke fakalelei’i telia ‘a e lelei fakalukufua ‘a e fonua.

‘Oku ‘ikai koe fakaanga ‘oku fakahoko pe ‘i Fale Alea ka ‘oku fakahoko pe mei ha tafa’aki pe ‘o e sosaieti ‘o kau ai mo e mītia pe ngaahi kautaha ongoongo ‘a ia koe fatongia mafatukituki ke ‘ilo ‘e he kakai ‘o e fonua ‘a e me’a totonu ‘oku hoko ‘o tatau ‘i he hala mo e tonu.

‘Oku mahino pe foki ‘oku totonu ke tau’atāina ‘a e mitia ke tu’u ‘i loto pea ke fakahoko loua mai ‘a e ongo tafa’aki. ‘I he taimi tatau ‘oku ‘i ai ‘a e ngaahi kautaha mītia ‘oku nau malele ma’u pe ke poupou ki he tafa’aki ‘oku ‘i ai ‘a e mafai ‘i he ‘uhinga ‘oku ma’u mei ai ‘a 'enau tu’umalie faka-fo’ituitui.

‘Oku ‘i ai mo e ngaahi kauataha mītia ‘oku tu’u mei he tafa’aki fakaanga ‘o fakahoko mei ai ‘enau sio mo ‘analaiso ‘a e to’onga mo e angafai ‘o e mafai pule neongo ‘oku nau ‘ilo ‘e uesia ai ‘a honau faingamalie mo ‘enau tau’atāina ki ha faingamalie ‘oku ‘i he malumalu ‘o e mafai pule.

Ko e me’a mahu’inga ia heni kapau ‘oku hokohoko ‘a e ngaahi faihala ‘i he fakahoko fatongia ‘a e mafai pule pea tenau tuhu'i mo tukuaki'i ‘a e kau fakaanga mo e ngaahi kautaha mītia ‘oku nau talaki 'a e faihala mo e pule kovi 'oku nau loi mo lotokovi tokua he ‘oku ‘ikai kenau toe mavahe kinautolu mei hono tukuaki’i ‘o e faihala pe ko fakaanga'i 'o e mafai pule 'o hange koe Pule'anga.

Ko e poini ia heni, kapau ‘e fakahoko lelei ‘e he mafai pule ia honau fatongia pea nau pule lelei pea ‘e si’isi’i leva ‘a e fakaanga ‘o mahino leva mei ai ‘oku ngāue ‘a e pule lelei, ‘ata ki tu’a mo e tali ui ki he kakai.

‘Oku toe fakaloloma ange ‘a hono taukave’i ‘e he ni’ihi ‘o kau ai pe mo e mītia ‘a e ngaahi me’a ‘oku ‘ikai totonu mo hala pea ‘oku ‘osi fakamo’oni’i ‘e he Fakamaau’anga, Konisitūtone mo e Lao ‘a ia ‘oku malava ke ui ‘eni koe angahala fai’ilo ‘o ‘ikai fai ha lau ia ki he maumau ‘a e ‘efika faka-faiongoongo mo e ola kovi ki he fonua fakalukufua.

‘Oku ‘i ai ‘a e kaunga lahi ‘a e ngaahi mītia ki he ngaahi tu’utu’uni ‘oku fakahoko ‘e he kau taki ‘i he ngaahi ‘aho ni kau ai hono veteki 'e he Tu'i 'a e Fale Alea pea ‘oku mahino ai ‘a e mahu’inga ‘a e tau’atāina ke lea ‘a ia ‘oku ho’ata mai ‘i he fakaanga mo e fatongia ‘o e ngaahi mitia.

‘Oku ‘i ai ‘a e taimi lahi ‘oku tāpalasia ai ‘a e fatongia fakaanga mo e mītia ‘o tala ‘a e loi mo e loto kovi ka ‘oku talamai ‘e he ngaahi me’a ‘oku hoko ‘i he ngaahi ‘aho ni (reality) ‘oku fu’u fiema’u ‘a e fakaanga mo e fatongia ‘o e mītia ke talaki ‘a e mo’oni ki he fonua he ‘oku ‘afio hifo ‘a Sihova.

'Oku 'ikai ngata ai koe fakaanga mo e mītia koe konga mahu'inga ia 'o ha fa'unga faka-temokalati pea 'oku mahu'inga ke tauhi, tokanga'i mo faka'ai'ai.

Leave a comment

Make sure you enter all the required information, indicated by an asterisk (*). HTML code is not allowed.

back to top