Kei puli ‘i tahi e tamai mo hono foha talu mei he Tokonaki 'i 'Eua Featured
Tu'aliku 'o 'Eua
12 Tisema, 2016. ‘Oku kei puli ‘a si’i tamai ta’u 40 mo hono foha ta’u 14 talu mei he ‘aho Tokonaki ‘i he potutahi ‘o ‘Eua.
Na’e folau ‘a e toko ua ko’eni ‘i he pongipongi Tokonaki 10 ‘o Tisema ‘a ia koe Tokonaki kuo ‘osi ia mei ‘Ohonua ‘Eua ko’ena toutai.
Na’a na fetu’utaki mai pe ki hona famili ‘o fakaha mai ‘oku ‘i ai e fakatamaki ‘oku hoko ki he misini ‘o e vaka. Na'e fetu'utaki leva hona famili ki he kau Polisi.
Na’e pau ai ke kau mai moe ngaahi vaka toutai fakataha moe vaka ‘o e Polisi koe ‘Alotolu na’e tuku atu mei Nuku’alofa ki he kumi ko’eni ka na’e ‘ikai ha ola.
‘I he fakamatala ‘a e Letio Tonga ‘oku faingata’a foki ‘a e fekumi ki he toko ua ni koe ‘ikai ha pikoni ‘i he vaka.
Na’e hoko atu ‘a e kumi ‘i he ‘aho Sapate ka na’e ‘ikai pe ha ola.
‘I he taimi tatau foki ‘oku ‘iai ‘a e kole mei he ma’u mafai ki he ngaahi vaka he ‘elia tahi ‘o ‘Eua kenau lipooti mai ka ‘ilo ha taha ki he tokoua ni.
