Logo
Print this page

Faka'amu ke Fakatolonga Faiva Ifi mo Ta Fangufangu

Faka'amu ke Fakatolonga Faiva Ifi mo Ta Fangufangu

'Oku lolotonga 'i Tonga ni ha ongo mataotao ka koe ongo tangata'ifonua Tonga ko Palofesa Dr. 'Okusitino Mahina mo Tu'ifonualava Kaivelata ke fakahoko ha'a na poloseki ki hono fakakake, fakatolonga mo hono toe fakafoki mai 'a e faiva tupu'a 'a 'ia 'oku 'iloa ko ifi fangufangu.

Ko e ongo tangata ni 'oku na nofo 'Okalani Nu'usila pea ko 'ena 'i heni ke fakahoko 'a e poloseki ko'eni 'a ia tena kamata mai mei Vava'u ke fekumi  ki he 'akau koe kofe 'a ia 'oku ngaahi 'aki 'a e me'alea tupu'a ni. Na'e kau mai foki 'i he folau ni 'a Taniela Kaivelata pehe ki he tangata Mauli koe poupou ki he poloseki ko'eni.

Na'e fakahoko foki 'a e lea 'a e ongo tangata 'i he po Monite ko hono 16 'o Fepueli 'i Haveluloto 'o faka'ilonga'i 'aki 'a e kamata 'a e polokalama papilika lekisa (Public Lecture Series) 'a e 'Apiako Fakavaha'a Pule'anga 'a Tonga (Tonga International Academy).  Na'e lea ai 'a e ongo tangata fekau'aki moe mahu'inga ke fakatolonga 'a e faiva ni mo hono mahu'inga faka tufakaholo ki he fonua. Fakatatatu ki he Fakamatala 'a Palofesa Mahina, na'a ne pehe koe konga 'uluaki 'eni 'o e poloseki 'oku na folau mai ai pea 'e hoko atu ki he konga hono ua 'i he mahina ko Sune 'a ia 'e fakahoko ai hano ako'i 'o e faiva ni pea 'e fakahoko pe ia 'i he 'Apiako Tonga Internayional Academy.

"'Oku 'ikai foki ke fu'u mahu'inga pe 'e manako 'a e kakai ia ki he faiva ifi fangufangu he 'oku fo'ou foki pea kuo fuoloa 'ene puli ka koe me'a mahu'inga ia heni ke fakatolonga he 'oku mole pea 'e puli 'aupito" koe fakamatala ia 'a Tu'ifonualava Kaivelata ki he ongoongo 'a e Nepituno. Na'e folau atu foki 'a e ongo tangata ni ki Vava'u 'i he pongipongi 'o e 'aho ni.

Nepituno Media Online © 2015. All rights reserved.