“ Siʻotoʻofa Hūfanga,
Mālō muʻa hono kei vahevahe mai e ngaahi ʻilo loloto mei onoʻahó ke ne tataki ʻetau fononga ʻi onopō mo e kahaʻú. ʻOku mālie fau hoʻo vahevahe ki he faʻahinga lalahi ʻe 5; pea ʻoku hoʻata mai naʻe fakakaukau lahi ʻetau fanga kuí ki he meʻá ni. ʻOkú ou tānaki atu ki he "kuohoko, hoko, mo e kahoko" ʻa e lea ko e "kituʻa", ʻo hangē ko e uike kituʻá, mo e māhina kituʻá, ʻo ʻuhinga ko e kahaʻu ʻo e kahokó ko e kituʻa, he ʻoku toki fou mai ʻi he tuʻa ʻo e uike hokó mo e māhina hokó. Ko e "kahoko" ko e "immediate future" pea ko e "kituʻa" ko e "further in the future." Ko e lea tuʻá, ʻo ʻuhinga ki he kahaʻú, ʻoku toe hā mai ʻi he ʻetau lea "tuʻamelie, tuʻatamaki, fakatetuʻa, mo e ngaahi lea kehe. Pea ʻokú ou tui ko e ʻuhinga eni ʻoku vahevahe ai e nofo ʻa e Tongá ki he "ʻeiki" (first born, elder) mo e "tuʻa", he ko e kau tuʻa ko e siʻisiʻi (later born, younger), toki fanauʻi mai kimui he tuʻa ʻo houʻeikí. Ko e ʻeiki-tuʻá ko e foʻi vahevahe fakatā-vā.
ʻOfa atu fau mei Havaiki,
Maui-Tāvā-He-Akó ”