“ Fakamalo atu Hufanga mo Kolokesa he fokotu'u kaveinga lelei ke fai ha tanaki mo ha fakakaukau lahi ki ai. 'Oku mahino lelei na'e fakanofo 'a Havea Hikule'o ko Helu ko 'ene ngaohi 'a e helu faka'ofo'ofa 'o e Tu'i Tonga ko ia ko Pau ka e na'e 'IKAI ke fakanofo kihe hingoa ko Palatavake he ko e hingoa ia 'a e helu 'o e Tu'i Tonga ko Pau.
Ko ia ai ko e Palatavake ko e hingoa fakatapau ia 'o e helu na'e ngaohi mo'o Pau ka 'oku 'IKAI ko e helu kotoa pe ko e Palatavake 'o hange ko e lahilahi ma'u hala 'a e kau fai 'atolopolosia mo e kau fai hisitolia muli. 'Oku ofi ia hono ui he ngaahi misiume 'a e povai ko e 'akautau ka e hili ko ia 'oku lahi 'a e 'akautau 'oku kau ki ai 'a e me'atau kotoa pe 'oku ngaohi'aki 'a e 'akau 'o hange ko e tao pea kau ki ai mo e povai.
Ne u lau 'a e 'atikolo ki mu'a he ngaue faka'aati lelei mo lahi 'oku fai 'e Hufanga mo Tu'ifonualava Kaivelata hono to e fakamo'ui 'a e ngaahi me'alea tupu'a faka-Tonga kuo mole mo ofi ke mole 'o hange koe tukipitu 'a ia 'oku toe pe 'a e ua he misiume 'i Norway mo Ireland ka e mole 'aupito mei Tonga he senituli 'e ua tupu 'eni 'o 'ikai to e ngaohi mo tuki 'e he kakai Tonga.
'Oku tatau pe mo e toe ua 'ae helu 'o hange ko e ongo helu 'o Pau na'e ngaohi 'e Havea Hikule'o 'a ia 'oku kei tauhi he ongo misiume 'i Vienna mo Madrid 'i 'Iulope. 'Oku toe 'eni ke fakapapau'i ko e ongo helu tatau na'e ngaohi 'e Helu Havea Hikule'o 'o hange ko ha feinga ke fakapapau'i 'a e ongo tufunga ngaohitukipitu na'a na ngaohi 'a e ongo tukipitu 'i Norway mo Ireland ka ko e toki fekumi ia ka loloa mo faingata'a. ”