Hiva Afā ‘a Vaea ^Featured

1.    He sikā‘ahema fakahihifo
    Louloua’a e matangi tō
    Kolongatata ne fakauō
    ‘O falala ‘i Faka’osikato
    ‘Ise’ia e! Kao mo Tofua
    Vilingia hoto kie tāua
    Kuo hola ‘a e Fanga-I-Lifuka
    Tounoa ‘a e Maka-Ko-Loupua

2. Pā ‘a e ui mo e fie uō
    Ofo ‘a e Fanga-Faliki-Pako
    Fine Ha’apai, fakafanongo
    Ui ‘a e fangufangu ‘i he pō
    ‘O fakamafola ki he mama’o
    Ko si’oto salusalu manako
    Ke talia ‘a e angi na’a tō
    Ke me’ite Sia-Ko-Veiongo

3. Ka fehu’i ‘e he Futu-Ko-Vuna
   Pe ‘ekea ‘e he Taungapeka
   ‘E Tautavale pe ‘i ke tala
   Ko au ē ko e talatā
   Ko e manusiu ‘o Uoleva
   Ko si’eku me’akai ko e fā
  'O inu hahau mo kai la’ā
  Mohenga 'i he fisi 'o e naua

Tau:  

    Lelea ē hoku ‘ofa atu
    Sia-Ko-Kafoa, ‘Alo-I-Talau
    Tangi ‘a e Toa-Tu’uakitau
    He kuo fe’ofa’aki ‘a kakau
    Fasi pē sila tuku ki Manono
    He fangu malingi ‘i Vaha’akolo
    Ke ngangatu mo ‘alaha ‘i he loto
    Ka faingata’a pe faingofua
    Ha’apai tu’u ho’o kaimu’a