Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

Pilinisesi Ashika Featured

Pilinisesi Ashika

‘AATI & LITILESĀ/ART & LITERATURE
TA‘ANGA/MAAU & HIVA/POETRY & MUSIC

PILINISESI ASHIKA

Fatu ‘e Kakala Taumoefolau

1. Pongipongi hake e ‘aho ko ē
Fakaloloma e ongo ne pehē
Kuo ikuna e tau ‘a maté
Vetekina si‘i ngaahi lotofalé
Tangi ki ‘ulu, tangi ki va‘é
Mole ni kuo faivavale
Lau‘aitu ‘a e ‘oiauē
‘E lava ‘e hai si‘ono vete
Tuku ā ke u ui, ui noa pē
‘Ise ‘isa e, ‘oku ke ‘i fē

2. Kolongatata, ‘oku fēfē
‘Otumu‘omu‘a he ko au ē
Kuo fe‘ofa‘aki ‘a kakau pē
Tengihanga si‘i ngaahi fa‘ē
Ta‘ehua kuo hulu mo opé
‘Oku ‘eke ‘e he Fo‘i ‘One‘oné
Nganaiki e le‘o ko e vākē
‘A e tangi fai mei he até
Tonuhia ‘a fai‘ekina kuo kehe
Peheange mai ko ha siu kae aké
Pe hungaluopea he matafuefué
Tāpinga ‘a maama ‘emau ‘inasi ho‘o vahe

3. Si‘i fonualoto he moaná
Toka‘anga o Pilinisesi Ashiká
Fakafe‘aoa ‘e he manu e vaha
Fofola fala he ta‘e‘iloá
Mohenga he fisi ‘o e naua
Inu tahi mo hono ha‘aha‘á
Ko hai ia to‘a te ne malavá
‘Amusia pē peau ‘oku taka
Māta‘ia e fānau mo e makapuná
Angai ‘a e taufa ni ‘o ne taá
‘Avea e koloa mahu‘inga tahá
Fua ‘o manava, foaki ‘a e ‘Otuá

4. Tofanga he fakaevahá
Nānunga ‘a e nofo natulá
He toki tama faifaiangá
Tonumia e ngaahi ‘ofa‘angá
Toka he ‘ōseni lolotó
‘Unaloto e manatu mama‘ó
‘O hala ha me‘a masani
Ke fakalelu e fakatamaki
Fakana‘una‘u ā mo e ‘amanakí
Ha femataaki ‘i loto Hēvaní

KO E KI‘I FAKAMATALA NOUNOU

‘Oku te fiefia noa mo haka he langi kuo tau ko e lavemonū ‘a e kolomu ni he faiva ta‘anga mālie fau ‘a Kakala Taumoefolau ko e “Pilinisesi Ashika,” ‘a ia na‘a ne ngāue‘aki lelei fakatoulōua ‘a e heliaki fakafetongiaki mo e heliaki fakafekauaki, ‘o ne fakamatala ‘o pehē, “Ko e manatu mo e ‘ofa mamahi he mole tahi ‘a e Princess Ashika, ne tukufolau ki he fakangalō he ‘aho 15 ‘Ākosi, 2009.” Na‘e hoko ‘a e fakatamaki ki he vaka ko e “Pilinisesi Ashika,” ‘o hangē pē ko ia na‘e hoko tonu ki he vaka ko e “Tuaikaepau,” ‘a ia na‘e mole fakatou‘osi ai ‘a e mo‘ui, ‘o fakaola he mate, mamahi mo e tangi. ‘Oku lava pē ke to e lau ‘a e faiva ta‘anga fakamamahi ni ko e faiva ta‘anga tangilaulau, faiva ta‘anga fakatangi mo e faiva ta‘anga tengihia.

‘Ofa lahi mo e hūfaki.

Fai ‘e Palōfesa Hūfanga Dr ‘Ōkusitino Māhina
Professor of Art, Culture and Critical Anthropology
Vava‘u Academy for Critical Inquiry and Applied Research [VACIAR] &
Tonga International Academy [TIA]

Leave a comment

Make sure you enter all the required information, indicated by an asterisk (*). HTML code is not allowed.

back to top