Manatu ki he 18 Featured
Manatu ki he 18 (Manatu kihe mahaki faka‘auha ‘oe 1918)
Koe fakafatu, fakafa‘u, mo fakaafo, fakafasi, ‘ehe punake ta‘e‘iloa (Koe ta‘anga hiva usu fakalotu)
Kupu, veesi 1.
Hiki ‘etau fononga
Ke fai atu he hala
Kupu, veesi 2.
Manatu kihe 18
Mo ‘ene fu‘u fetuku
Kupu, veesi 3.
Vakai kihe mate
‘Ene hange ha vaitafe
Tau, kolesi:
Sisu e! Teu fefe nai?
Koe mate ‘ena ‘oku ‘iai!
Sisu e! Ko hai mo hai?
Ko Koe pe teu hao ai!
Koe ki‘i fakamatala moe huluhulu nounou.
Na‘e fatu, fa‘u, ‘ae ta‘anga hiva usu fakalotu kupu, veesi, 3, kohi, laini, 2, moe tau, kolesi, kupu, veesi, 1, kohi, laini, 4, malie fau ko ‘eni, ‘Manatu kihe 18’ (manatu kihe mahaki faka‘auha oe 1918), ‘ehe punake ta‘e‘iloa. ‘Oku matamata na‘e fatu, fa‘u, ‘ae ta‘anga hiva usu ni he lotolotonga pe hili ‘ae 1918 (Na‘e ma‘u foki ‘ae lea ‘usu’ mei Ha‘amoa, ‘o ‘uhinga pe koe hiva moe ‘uhu’ pe ‘langa’ pongipngia, ‘o hange koe ‘lotu uhu’ pe ‘lotu pongipongi,’ ‘aia na‘e lahi ai hono hono ‘hiva’ ‘ae ‘usu’).
‘Oku nounou pe mo to‘o ma‘ama‘a ‘ae lea ‘oe ta‘anga ka ‘oku loloto fau hono ‘uhinga. ‘Oku hange ‘ae kupu, veesi, 1-3 ha ‘talatala mahaki’ ‘a Tonga kihe Toketa Lahi ko Sisu he‘enau fonongaloa he toafa faingata ‘oe mamahi moe tangi (‘o ngaue‘aki ‘ae mahaki faka‘auha FLUD-18 koe heliaki kihe hiva Uike Lotu koe Uike Ha‘amo, Uike Teu Folauloa ‘i Vaha, Uike Tota‘u, moe Uike Teu Fonongaloa ‘i Toafa), ‘o hange koe ta‘ematukutuku ‘ae taufetuku ‘a mate, ‘aia ‘oku hange tofu ha vaitafe. ‘Oku hoko leva ‘ae tau, kolesi, koe ‘tautapa’ moe ‘tauto‘e’ ‘a Tonga kihe Toketa Lahi mo toe Fai Fakamo‘ui ko Sisu kene fai honau ‘hakeaki’ moe ‘haofaki’ mei he mate kihe mo‘ui.
Na‘e ‘iloa ‘ae mahaki faka‘auha ‘oe 1918 koe ‘influenza’ kae fakanonou pe koe FLUD-18, ‘o hange pe koe mahaki faka‘auha ‘oku lotolotonga to ‘i mamanilahi koe ‘coronavirus’ ‘oku toe fakanounou pe koe COVID-19. Na‘e pa mai ‘ae COVID-19 he 2019 koe mahaki pipihi, infectious disease, ‘o hoko koe mahaki faka‘auha, ‘aia na‘e kamata ‘i Siaina (koe epidemic), pea ko ‘eni kuo ne mafola lahi ke kapa mo kapu ‘a mamanilahi (koe pandemic), ‘o hange pe koe FLUD-18 (koe pandemic).
