‘Atu Matá ^Featured

1. Si‘i huni ‘o ‘Atu Matá
Fio‘anga ē uaine kakalá
‘Alaha ngangatu ko e mo‘oniá
Pefiume ‘o e Hala Kāsiá

2. Huhulu ne ‘ikai ‘ao‘aofiá
Ho‘o hā ki he ‘atimosifiá
Ifo leva ‘eku siutaká
Hono ‘ea ne ongo fakalatá

3. Matangia ē ‘ofa pea ne u hē
Lītaula ‘i he napa‘alilo é
‘E uku ha punake ‘o ‘ilo ki fē?
He moana ia ‘oku ‘ikai takele

4. Tā kuo mo’oni si‘eku misī
 Ki he pupunga ko Peliatisí
‘Oku na tutu‘u mo Vēnusí
 ‘O na tālave he ‘ofa ‘o taimí

Tau:
Ko si‘oto kakala taulevá
Kaloni ahi ‘o ‘Atu Matá
Ka ‘o ka tupu ‘o matalá
Ko hono toli ‘e ‘ikai lavá

KO E KI‘I FAKAMATALA NOUNOU

‘Oku te lea ni mo e ‘apasia he‘ete tapakina mo malū‘ia he’ete hu’ekina ‘a e faiva ta‘anga hiva kakala mo e faiva ta‘anga hiva viki ‘a e ongo pulotu fa‘u / punake mo e pulotu hiva / punake, ‘a Saimone Koloamatangi [Mafua-‘ae-Lulutai] mo Nāsio Lātū, ‘a ia na‘a na fakanimamaka he ongo faiva tupu‘a ni ka kuo na puli atu he mamani ‘o e fakangalo ka e ke i tolonga mai hono lea fonu he masani mo ‘eko mai hono afo / fasi mohu he fungani he vaha‘akuonga mo e to‘utangata he funga ‘o e tatau, potupotutatau mo e faka‘ofo‘ofa / mālie.

‘Oku mālie fau hono ngāue‘aki ‘e Saimone Koloamatangi [Mafua-‘ae-Lulutai] ‘a e ngaahi lea Tonga ohi mei he lea ‘Ingilisi, ‘o fakakātoa ko e fo’ilea ‘e valu fakataha mo e ngaahi lea kehe ko e heliaki fakafetongiaki mo e heliaki fakafekauaki. ‘Oku to e mālie ange ‘a e ngaahi kohi / laini ‘e fā [4] faka‘osi ‘o e ngaahi kupu / veesi ‘e fā [4] fakataha mo e tau [chorus], ‘o tefito he loloto mo fakapoto hono fakatatau ‘e he pulotu fa‘u / punake ‘a e faingata‘a ‘o e ‘ofa ki hono ukufi ha moana ta‘etakele mo ha kaloni ahi ‘oku matala ka e ta‘elava hono toli'a.

Fai ‘e Palōfesa Hūfanga Dr ‘Ōkusitino Māhina
Professor of Art, Culture and Critical Anthropology
Vava‘u Academy for Critical Inquiry and Applied Research [VACIAR] &
Tonga International Academy [TIA]