Ha‘a Moheofo ^Featured

Fai ‘e he Fola‘osi, Kanokupolu

1. Ha‘a Moheofo ē ko e hau
Ke mou kumia si‘i fo‘i fātapu
Tala ki he tonga moe tokelau
Ko e tavake ni ‘e fakafolau

2. ‘Ofa ke kau mai ‘a e langi
‘I he feinga ‘oku lolotonga fai
Ke ‘aonga kihe si‘i mo e lahi
Tui hao kahoa pea ke laukau‘aki

Tau. ‘A e Tonga ke ke tu‘u ‘o tuē
Fiefia ‘i hē ‘aho ko ē
Ko Kanokupolu ke i tu‘u pē
‘O puke ke ma‘u ‘a e talite
Ke i malu ‘a e lao mo e tūtone
‘Eva koe mo pā‘ehē
Ke i tu‘u ma‘u si‘ene pule

Ko e ki‘i fakamatala nounou.

‘Oku ma‘u ‘a e tala na ‘e fakafatu/fakafa‘u mo fakafasi/fakaafo ‘a e ta ‘anga hiva viki mālie ni ‘e he punake ko Siope Puli mei Kanokupolu kuo ne si‘i pekia mo hiva ‘e he kau hiva ‘iloa ‘a e Fola‘osi ‘a Kanokupolu. ‘Oku matamata na‘e fatu/fa‘u ‘a e ta‘anga ni hono talaki ‘o e ma‘alali ‘a e maa‘imoa ako ‘ae fale‘alo ‘i muli (kupu/veesi 1 & 2) na‘e fai hono lotua mo e hufia ‘e he kotoa ‘o e fonua pea kuo fakaola ma‘ae lukufua ‘o Tonga mo hono kakai (tau/kōlesi).

‘Oku ngaue‘aki lelei ‘e he punake ‘a e heliaki fakafetongiaki (epiphoric, qualitative heliaki; hangē ko e kupu/veesi 1, kohi/laini 4) mo e heliaki fakafekauaki (metaphoric, associative heliaki; hangē ko e tau/kōlesi, kohi/laini 5). ‘Oku ngāue‘aki tau‘atāina ‘e he punake ‘a e ngofua fakapunake (poetic license) ke ne filihi ‘a e lea liliu Tonga ko e “konisitūtone” mei he lea ‘Ingilisi ko e “constitution” ko e “tūtone” (tau/kolesi, kohi/laini 5).

‘Oku to e mālie lahi hono to e fakamanatu mai ‘e he punake ko e malu‘anga ‘o e fonua ko hono “lao mo e konisitūtone” na‘e tufunga ‘e Tupou I ‘o fuofua fakahū ai ‘a e fakakaukau muli ‘o e “temokalati” ‘oku ‘iloa ‘i Tonga ko e “tau‘atāina” mo kamata hono fakanunu mai he Lao ‘o Vava‘u 1839, Lao ‘o e Tau‘atāina 1862 mo e Konisitūtone 1875 ‘o tumutumu hono Tuku ‘o Tonga ki Langi mo e fokotu‘u ‘o e ongo Kolisi tupu‘a, Kolisi ko Tupou mo e Kolisi Tonga.